Ilinniariarniarlutik Danmarkiliartartut amerliartorput
- Kisitsisit takutippaat ilinniariarniarlutik Danmarkiliartartut amerlaqisut. Kisitsisit ataatsimut isigigaanni takuneqarsinnaavoq pingajorarterutaat ilinniariarniarlutik Danmarkiliartartut. Taamaammat oqartoqarsinnaanngilaq qimarrattoqartoq, Naatsorsueqqissaartarfimmi siunnersortaaneq Lars Pedersen oqarpoq.
Inuit 3.175-it Nunatsinnit nuunniarlutik 2008-mi aalajangersimapput, Nunatsinnullu nuuttut 2.537-iullutik. Tassa taamaalilluni Nunatsinni innuttaasut 638-nik siorna ikileriarput.
Avammut nutsertut 2004-mit maannamut amerliartulersimapput, taakkunannga amerlanerit 15-it 29-llu akornanni ukioqarput. Naatsorsueqqissaartarfiup kisitsisaataasa aamma takutippaat avammut nuuttut amerlanerit arnaasut.
Kisitsisit nutaat Naatsorsueqqissaartarfimmeersut ersersippaat, Nunatsinni innuttaasut ukiut sisamassaannik ikileriarsimasut. 2005-imi januaarip aallaqqaataani Nunarput 56.969-inik inoqarpoq, 2009-milu januaarip aallaqqaataani 56.194-inik inoqarluni, tassa ikileriaat 715-iulluni.