Ilinniarfiit arlallit, ilinnialertussat inissaannik qulakkeerinneqqaaratik, ilinnialersussanut billettinik nassiussuisimapput.
- Taakkualu inissaarukkallarput, Ilinniartut ineqarfiisa allaffeqarfianni pisortaq, Ane-Karen Løvstrøm oqarpoq.
Inissaarukkallartunut ilaavoq Jørgen Rosbach Ilulissaneersoq. Taanna ilinniartitsisunngorniarluni Nuummut atuariartorpoq:
- Aallarnissara 1 tiimimik sioqqullugu paasivara suli inissannik tunineqarsimananga, billettissaralu utertinnialeraat. KAF-imut attaviginnikkama oqarfigineqarpunga sapaatip akunnera ataaseq nalunngisanni najugaqarsinnaaguma inissaqalissasunga, tikikkamalu inissaqannginnama atuaqatinni najugaqarpunga, Jørgen Rosbach oqaluttuarpoq.
Kollegiassaaruttoqartarnera Ilinniartut ineqarfiisa allaffeqarfianni, KAF-imi, takornartaanngilaq.
- Ukiut tamaasa tamatuma nalaani kollegiassaaruttarpugut, kollegiaateqarnerput sinnerlugu atuarfiit tigooraasaramik, Ane-Karen Løvstrøm oqarpoq.
Taanna nassuiaavoq ilinniartussat inissaqartinneqaratik Nuummut tikereersimasut, ilinniartut allat arlaannik patsiseqarlutik ilinniarunnaarniartut inissaraluinik tulleriiarlutik tuniorarneqartartut.