Ilinniakkaminnik taamaatitsiinnartartut ikileriarput
AG-mi ullumi saqqummiunneqartumi allaaserineqarpoq, ilinniakkaminnik taamaatitsiinnartartut ukiut pingasut ingerlanerini 15 procentimik ikileriarsimasut. Tamannalu ilinniartitaanermut pisortaqarfiup pisortat ilinniarfeqarfiini siunnersuisarnerup pimoorunneqalerneranik pissuteqarsoraa.
Ilinniarfinni siunnersuineq nukittorsarniarlugu 2000-imi siunnersuisartunut ilinniartitaaneq pilersinneqarpoq.
- Ilinniarfinni siunnersuisarnerup malunnaatilimmik pitsanngoriarsimanera malugisinnaavarput. Pitsaanerusumik siunnersuisalernerup ilaatigut sunniuttaasa ilagaat, ilinniakkanut tiguneqarfigisinnaanngisanut qinnuteqartartut ikileriarsimanerat, inuussutissarsiornermut naalakkersuisoq Siverth K. Heilmann AG-mi taama issuarneqarpoq.
Ukioq manna siunnersuisartutut ilinniartitaanerup kalaallisuinnaq ingerlanneqarsinnaaneranut periarfissiisoqarsimavortaaq, inuillu 30-t pikkorissarnermut peqataaniarlutik nalunaareersimapput.
