Ilinniakkaminnik aallussilluarput
INUILI-mi pisortaq, Esben Toftdahl, siullermik unnersiorpoq, ukiuni kingullerni taamaatiinnartartut procentip ataatsip marlullu akornanni amerlassuseqartut.
Tamanna anguneqarpoq ilinniarfimmi ilinniartitsisut ilaatigut paarlakaajaallutik ulloq unnuarlu piareersimatittarnerisigut. Taamaalilluni ilinniartut ajornartorsiuteqarunik, nuannaanngissuseqarunik angerlarserunilluunniit oqaloqateqarsinnaallutik, Esben Toftdahl oqarpoq.
Ajornartorsiutinilli imaaliallaannaq qaangerneqarsinnaanngitsunik naammattuuisoqarsinnaasarpoq.
Angerlarsimaffimmi aningaastigut ajornartorsiornerusinnaapput, tarnikkut ajornartorsiutaasinnaapput, allalluunniit. Ilinniartut akornanni arnat taamaatiinnartartut amerlanerupput, tamatumunnga Esben Toftdahlip pissutaanerarpaa, aappaasup uiusulluunniit sangialluni angerlaqqusiinnartarnera.
- Ajoraluartumillu ilai sanngiittarput, tunniutiinnarlutik angerlartariaqartartut.
Tamanna akulikitsumik pisarnersoq apeqqutigineqarmat, Esben Toftdahl akivoq:
- Qujanartumik qangatut amerlatigiunnaarput, kisianni suli naammatuuisarpugut.
Taamaatiinnartartut amerlanerusut allat tassaapput sungiusaatigalugu sinerissami sulisut 40 procentit missaanniittut.
Sapaatip akunnerisa naanerini nalliuttunilu piffissani nikerartuni sulisoqartariaqartarpoq.
Taamaannerani kammalaatit arfininngornikkut unnukkut freerlutik fisterniartut ilagisariaqarsinnaasannginneri ussernartorsiorfigineqarsinnaasarput, tamatuma kingunerisarlugu ilinniartut ilaasa allamik ilinniagaqarnialersarnerat.
Sungiusaatigalugu sulisut taamaatiinnartartut ikilisinniarlugit, sullivinni siunnersortit pikkorissarniarneqarput, aamma ungasianiit ilinniartitsinerup ingerlanneratigut, tamannalu ilinniartunit sulisitsisunillu iluarineqartoq, Esben Toftdahl oqarpoq.