Ilinniagaqarnissamut periarfissanik amigaateqarpoq

Susanne Schmidt Ilulissaninngaanneersoq 40-inik ukioqarpoq naqinnernillu ilisarinnissinnaanani. Taassuma ilinniagaqarnissamut ikiorserneqarsinnaaneq amigaataasoraa.

- Angummakkusunnartorujussuuvoq, nammineq pappilissakkut takusinnaallugu, allataasimasut namminerlu atuarsimasat takusinnaallugit. Uppernarsaatissaqarluni. Taanna angorusuttorujussuugaluarparput, Susanne Schmidt oqarpoq.

Susanne Schmidt meeqqerivimmi paarlattaasartutut sulisarpoq. Naqinnernillu ilisarinnissinnaannginnini pissutigalugu ukioq 2000-mi Piareersarfimmi ukioq ilinniarfigisani angusaqarfiginngilaa, naak assassorluni ilinniarnikkut ingerlalluaraluarluni atuagarsornikkut nalorsarami, sulilu maannamut ingerlariaqqinnani. Naqinnernillu ilisarinnissinnaanngitsut ikorfartoqatigiiffiannik Ilulissani 2010-mi pilersitseqataavoq. Tassani ilinniagaqalernissamut atatillugu ikiorserneqarnissamut periarfissat amigaataaneri eqqartorneqartarput.

- Ilaana. Ersinnginnami, amerlasoorsuugunanngikkaluarpugut taamatut ujaasisartut, amigaataanera killormoortuanik inissikkusunnarpoq, Susanne Schmidt ilinniagaqqilernissamut ikiortissat amigaataaneri pillugit taama oqarpoq.

Naqinnernillu ilisarinnissinnaanngitsut ilinniagaqaqqinnissaminnut ikorfartorneqarlutik periarfissaat pillugit, Demokraatit sinnerlugit inatsisartunut ilaasortaq Anda Uldum Naalakkersuisunut apeqquteqaateqarpoq.

- Nalunnginnatsigu nunaqqateqarluta naqinnernik ilisarinnissinnaanngittunik, immaqa ilinnialerusukkaluarlutik sakkussaminnik amigaateqartut, tamanna tunngaviginerullugu apeqquteqaateqarpunga. Ersarissumillu paaserusullugu suliniutit suut ingerlanniarneqarnersut imaluunniit suliniutit suut maannakkut ingerlanneqarnersut, Anda Uldum apeqquteqaatini pillugu nassuiaavoq, oqarlunilu ilinnialernissamut periarfissanik ammaassinissaq pingaaruteqartoq.

- Una ajornartorsiummi annerpaartaavoq, periarfissaasa annikinnerat ilinnialernissaminnut. Unammilligassatut annerpaatut isigaara periarfissaannik ammaassuussisariaqartugut. Uku nukissaliullutik ilinniarusullutik pisut mattunneqannginnissaat pinaveersaarterujussuartariaqaratsigu, Anda Uldum oqarpoq.

Susanne Schmidtilu isumaqarpoq ilinniagaqalernissamut ikiorneqartalersinnaaneq iluaqutaassasoq, neriupporlu nuna tamakkerlugu periarfissanngorumaartoq.