IA: Ilinniagaqarnersiutit, attaveqaatit pitsaat ajornartorsiuteqartunullu ikiuutit

Danskit ilinniagaqarnersiutaannik SU-nik allannguinerit kingunerinik kalaallit ilinniagaqartut eqqornerlunneqassanngillat.

Danmarkimi Kalaallit inuuniarnikkut ajornartorsiuteqartut Kalaallit Nunaannilu Politiit isumagilluarneqassapput.
Danskit aappaagumut aningaasanut inatsisissaannut Inuit Ataqatigiit Folketingimut ilaasortaatitaata Aaja Chemnitz Larsenip piumasaqaatai pingaarnerit tamakkuupput. Danskit aningaasaqarnermut ministeriat Claus Hjort Frederiksen ullumi ataatsimeeqatigereerlugu Aaja Chemnitz Larsen taama oqarpoq.

- Pingaarnerpaapput kalaallinut ilinniagaqartunut tunngasut, amerlasuut Danmarkimi ilinniagaqarnerminni taamaatiinannginnissaat anguniarlugu naalakkersuisut peqatigalugit aaqqiissutissanik nassaartariaqarpugut, Aaja Chemnitz Larsen oqarpoq.

Naalakkersuisut ilinniagarsiutit SU't allannguiffigerusuppaat, affaat tapiissutinngortillugit, sinneruttullu attartuganngortillugit. Taarsiullugu ilinniagaqartut naammassigunik akileraarusigassanut ilanngaammik aaqqiivigineqassapput.

Kalaallit Nunaannili allaanerusumik akileraartaaseqarpugut. Taamaattumik Inuit Ataqatigiit danskit naalakkersuisui piumaffiginiarpaat naalakkersuisut peqatigalugit aaqqiissutissarsioqatigeeqqullugit, Aaja Chemnitz Larsen oqarpoq.

Piumasaqaat alla tassaavoq kalaallinut Danmarkimi inuuniarnikkut ajornartorsiuteqartunut aningaasaliissutit amerlineqarnissaat.

Piumasaqaatinut ilaavoq Kalaallit Nunaanni politiinut attaveqaatit nutaat pitsaanerusullu.

- Taakku pingasut - tassa ilinniagaqartut, kalaallit inuuniarnikkut ajornartorsiuteqartut attaveqaatillu pitsaanerusut - tamakkuupput ukiumi aggersumi tusaaneqarluta aaqqiivigerusutagut, Aaja Chemnitz Larsen oqarpoq.

Aammattaaq attaviitsup Aleqa Hammondip pingasunngornermi aningaasaqarnermut ministeri ataatsimeeqatigissavaa.