Ilinniagalinnut nunatsinnut uterusuttunut nittartagaq nutaaq
Nunatsinnut amerlanerusunik sulisussarsisinnaajumalluni Namminersornerullutik Oqartussat Sulisitsisut Peqatigiiffiat Kanukokalu suleqatigalugit nutaamik nittartagartaarpoq.
Allattoq Louise M. Kleemann
Nittartagaq nutaaq Danmarkimi sapaatip akunnerata naanerani tullermi sullivinnik nittarsaassinissarsuarmi saqqummiunneqassaaq.
Nittartagaq taaguuteqartussaq www.uterta.gl annerusumik kalaallinut Danmarkimi ilinniagaqartunut, ilinniarnerminnik naammassinnikkunik nunatsinnut uterusuttunut annerusumik saaffiginnittuuvoq.
- Ilinniartut siunissami nunatsinni inuussutissarsiornermi sulisorineqalersinnaanissaat nittartakkami siunertarineqartoq, Sulisitsisut Peqatigiiffiat oqarpoq.
Sulisutut nutaatut sulisutoqqamik malittarinnissinnaanermut tunngasunik paasissutissat nittartakkami ilaatigut paasissutissiissutigineqassapput.