Ilimmaasaq pilersinneqarpoq
Peqatigiiffiup Narsami ippassaq ataatsimeersuarnerani, Josef Petersen siulittaasussatut toqqarneqarpoq.
Narsap eqqaani aatsitassarsiorniartoqartillugu misissuisoqartillugulu tusarniaaffigineqartarnissaq, peqatigiiffiup siunertaasa ilagaat.
Narsap eqqaani aatsitassarsiornissaq inuit peqqissusaannik akornusiinngippat aamma avatangiisinut pinngortitamullu naliginnaasumit annertunerusumik mingutitsisuunngippat peqatigiiffimmit tapersersorneqarpoq.
Sulisussat nunaqavissut amerlanerpaaffianiitinnissaat peqatigiiffimmit aamma anguniarneqassaaq.
Narsap eqqaani aatsitassarsiorniarnermi misissuinernilu paasissutissat eqqortut aallaavigalugit oqallinnerup ingerlanneqarnissaa, taakkulu illoqarfimmut allanullu siaruarternissaat, peqatigiiffiup siunertaasa ilagaat.
Siulersuisunngortut sinneri tassaapput; Siulittaasup tullia: Sofus Frederiksen
Aningaaserisoq: Poul Kielsen, ilaasortaq Helle Petersen, Allatsi:Elias Didriksen, Sinniisussaq siulleq: Tittus Egede, Sinniisussaq tulleq: Mathæus Godtfredsen.
