Iligiiaarluni arpanneq annertusiartorluarpoq
Holdit 70-inik sinneqartut stafetimut juunip ulluisa arfineq-aappaanni peqataaniarlutik nalunaarsimapput, Inussivimmiinngaanniillu aallassallutik. Taamalu amerlatiginissaat Tele-Postimit ilimagineqarsimanngikkaluarpoq, tassami neriuutigineqarsimagaluarmat holdit 50-it peqataasinnaanissaat. Holdit 47-t siorna peqataapput.
- Ilimagisatsinniit amerlaneroqaat. Peqataasussat isiginnaartussallu nuannisaarluartinnissaat qilanaaraarput, Tele-Postimi HR-imi pisortaq Karl-Henrik Simonsen oqarpoq.
Siorna arpaqatigiinneq Naalakkersuisut siulittaasuannit Kuupik Kleistimit aallartinneqarpoq, aaqqissuisullu nuannaarutigisaannik ukioq manna aamma aallartitsisuunisarluni akuersaarsimavoq.
Nuummi nipilersortartoqatigiit Nuuk Byorkester arpaqatigiinnerup aallartinngilaattaani Inussiviup saavani appisimaassapput, Tele-Post Bandikkullu kingorna nipilersussallutik.
Holdit tamarmik immikkut tallimanik arpattoqassapput, tamarmik immikkut 5 kilometerinik arpassallutik.