Ileqquliussaq navianarluinnartoq

Danmarkimi niviarsiaqqat inuusuttuaraanerusut navianarluinnartumik ileqqoqalersimapput, tassa imminnut piaaralutik kilertitertalersimagamik.

Taanna ileqquliussaq cuttingimik taaguuteqarpoq, inuusuttuaqqallu ileqqorissutut isiginiarneqartartut eqqorneqarnerupput, taakku unngiaatip savissaanik talimikkut imminnut kilertitertarput, immaqa piumasatik pinngitsooraangamikkik, imaluunniit angutaatiminnit qimanneqaraangamik. Aviisi Metro Xpress taama allappoq.

- Massakkut iliuuseqanngikkutta qularinngilara ukiut tallimat qaangiuppata ajornartorsiuteqalerujussuassasugut, soorlu immaqa neriumajunnaartartut qanga ajornartorsiutigisarsimaqisatta assipajaavinik. Imminnut kilertitertartut katsorsaruminaattarput. Tamanna akisussaassuseqangitsuliorneruvoq annertooq, napparsimmavissuarmi Rigshospitalimi tarnip pissusiinik ilisimatuut ittuat, Bo Møhl, oqarpoq.

Meeqqat atuarfiini atuartut annerit agguaqatigiissillugu immaqa marluk imminnut kilertitertartut Bo Møhlip nalilerpaa, oqaluttuarporlu ilinniartitsisut aamma peqqinnissaqarfimmi sulisut imminut siarnguttaqisut, paasiniaaffigaluni inuusuttuaqqat arnat sooq taamaaliortarnersut.

- Taakkununnga pingaaqaaq iluartumik asannittumillu angutaateqarnissaq, atisaat mutiulluinnartariaqarput aamma kusanartumik soraarummeernissaq pingaaruteqaqaaq. Tamakku angunngikkaangamikkik imminnut uumigilersarput. Imminnut kilertitertartut misigissutsitik naatsorsorsinnaaneq ajorpaat, imminnullu unngiaatip savissaanik kilertiteraangamik pissanganartutut misigisarpaat, Bo Møhl oqarpoq.

Peqqinnissamut Folketingimi ataatsimiititaliami siulittaasoq, Birthe Skårup, oqarpoq, ajornartorsiut politikkikkut alaatsinaakkitsik, tarnikkullu nappaatillit pillugit isumaqatigiissummi nutaami ikiorsiinissamut pilersaaruteqartoq unnerpaa.