Ileqqorissaarnerulerpugunngooq

Politiit ukiumut nalunaarutaanni tamanna atuarneqarsinnaavoq.Nalunaarut tamaat aajuk.

Pinerluttaalisitsinermut inatsisinik unioqqutitsisut nalunaarutigineqartullu 2002-miit 14 procenti angullugu ikileriarsimapput.

Pinngitsaaliilluni atoqarteqarnerit imaluunniit pinngitsaaleeriarnerit 44 procentimik ikilisimapput.

Kinguaassiutitigut pinerlunnerit 24 procentimik ikilisimallutik.

Pinerlunnerit allarpassuit ikilisimasut suli taagorsinnaagaluarpagut - politiilli nalunaarutaat ersarivissumik oqariartuuteqarpoq, tassa Nunatsinni inuiaqatigiit pinerluppallaarunnaarsimapput. Pinerlunnerillu ikiliartornerannut nuannaarutiginninnerpaasoq, tassaavoq Nunatsinni politiit qullersaat, Bjørn Bay.

- Kalaallit Nunaanni pinerlunnerit ukiuni kingullerni ataatsimut isigalugit appariartorneri politiinit nuannaarutigiinnarsinnaavarput, Bjørn Bay oqarpoq.

Ukiuni kingullerni aqqanilinni annersaasarnerit eqqarsaatigalugit siorna nalunaarutigineqartut aatsaat taama ikitsiginerinut suna pissutaanersoq akissuteqarfigissallugu ajornakusoortoq, Bjørn Bay-ip oqaatigaa.

- Pinaveersaartitsinerit paasisitsiniaanerillu tamatumunnga pissutaasimasinnaapput, politiit, inunnik isumaginninnermik suliallit, peqqinnissaqarfik atuarfeqarfiullu sulilluarnerisa kinguneranik anguneqarsimagunarluni. Siusippallaarporli oqassalluni taakku pissutaallutik pinerlunneq appariarsimanersoq, tassami tamanna arlalippassuarnik pissuteqarsinnaammat, soorlu suliffissaaleqiunnaamisoqarnerani pinerlunneq appariartarmat, Bjørn Bay oqarpoq.

Inatsisinik unioqqutitsisarnerit ikileriarujussuarsimagaluartut, taamaattoq suli amerlavallaartut, politimesterip oqaatigaa.

- Ajoraluartumilli inoqatinut ulorianarsinnaasunik pinerlunnerit Danmarkimut naleqqiukkaanni suli amerlavallaarujussuarput. Danmarkimut sanillersuussigama tamatumunnga pissutaaneruvoq, Danmarkimi pinerlunnerit kisitsisaataat Nunatsinnut sanillersuuttaratsigit, Nunatsinni politiit qullersaat, Bjørn Bay taama oqarpoq.

Inatsisinik unioqqutitsinerit nalunaarutigineqartut amerlanersaat misissuinikkut paasineqartartut politiit nalunaarusiaanni allassimavoq, siornalu nalunaarutigineqartut 72 procentii eqqartuussivilersuunneqarsimallutik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat