Ilassinnissutinik atornerluisimaneragaanera eqqartuussivikkut suliarineqarpoq

Naalakkersuisunut ilaasortaasimasup Jens Napätôk'-p naalakkersuisuunermi nalaani ilassinnissutinik atornerluisimaneragaanera nunatta eqqartuussiviani aallarniutaasumik ullaap tungaa suliarineqalerpoq.

Jens Napätôk' naalakkersuisuunermini ilassinninnermut kontomit 128.366 koruunit atorsimavai, piffissami ukioq 2004-mi januaarip ulluisa sisamaanniit, juunip ulluisa 18-iannut 2005-imi

Ullumi eqqartuussinermi Jens Napätôk' akiliisinneqassanersoq imaluunniit pineqaatissinneqarsimasut inissiisarfiannut inissinneqassanersoq nalilersorneqarpoq, kingusinnerusukkut aalajangiiffigineqartussamik.

Unnerluussissoq, tassalu politimestereqarfik isumaqarpoq, Jens Napätôk'qaammatini sisamani pineqaatissinneqarsimasut inissiisarfianiittussanngorlugu pineqaatissinneqassasoq, iluatungaaniillu illersuisua Danmarkimi eqqartuussissuserisoq Advokat Phillip Comerford isumaqarluni, Jens Napätôk' akiliisinneqarnermik pineqaatissinneqassasoq.

Nunatta eqqartuussiviani eqqartuussinermik ingerlatsisoq, nunatta eqqartuussisuunera, Søren Søndergård Hansen oqarpoq, Jens Napätûp pineqaatissinneqarnissaanut unnerluussineq pineqaatissiinissamut kingusinaarnersoq, imaluunniit pineqaatissiisoqassanersoq sapaatip akunnerata ingerlanerani aalajangiiffigineqassasoq.

Unnerluussisoqarnissamik aalajangiisoqarpat, neriniartarfinni imerniartarfinnilu nunatsinni Danmarkimilu assiigiinngitsuni 120-ni nereqataasimasut peqataasimasullu uppernarsaasussatut aggersarneqassapput, nunatta eqqartuussisuunera Jens Søndergård Hansen oqarpoq.

Eqqartuussineq isiginnaarut video atorlugu Nuummi telemi ingerlanneqarpoq, Jens Napätûp illersuisua eqqartuussissuserisoq Phillip Comerford Københavnimiittoq.