Ilassinninnissamut aningaasaliissutinut malittarisassaqanngilaq

Inatsisartunut siulittaasuusimasoq Jonathan Motzfeldt ilassinnissutinik atuivallaarsimasutut pasillerneqareersorlu, Demokraatit piumasaraat, kukkunersiuisunik arlaannulluunniit atanngitsunik, pinngitsooratillu ukiuni sisamani atasartussanik, pilersitsisoqassasoq.

Partiip siulittaasua, Jens B. Frederiksen, ima oqarpoq:

- Kukkunersiuinermut ataatsimiititaliaq periarfissaqanngilaq Inatsisartut siulittaasoqarfia misissussallugu. Taanna assorujussuaq ajuusaarnarpoq. Aamma taamaallaat taamanna pisinnaavoq siulittaasoqarfimmi ataatsimiititaliani partiit amerlanerussuteqartuaannartut tunuliaqutaallutik akuerisimagaat suup tamarmi isertortumik ingerlanneqarsimanera. Tassani ukiorpassuarni suleqatigiissimasut assigiinngitsut eqqarsaatigaakka, Jens B. Frederiksen oqarpoq.

Tusarneqareersutut naalakkersuisunut ilaasortaasimasoq, Jens Napaattooq ilassinninnissamut aningaasaliissutinik 2005-imi atuivallarsimanerminik Østre Landsret-imi eqqartuussaavoq. Taamani qulaajasoqarnerata kingunerisaanik Naalakkersuisut ilassinnissamut aningaasaliissutit qanoq atorneqartarnissaannut malittarisassat sukaterpaat.

Kisianni Inatsisartut siulittaasoqarfiat, 1988-mi naalakkersuisunit immikuulersoq, taamani malittarisassiunngilaq.

- Minnerpaamilluunniit akuerineqarsinnaanngilaq, eqqarsaatigiuaannassavarput akileraartartut aningaasaatigigaat taakkua atornerlunneqarsimasut. Taamaammat uagut demokraatininngaaniit siunnersuutigereerparput ammanerusumik ingerlatsisoqalernissaa. Tassa revisionssystem nutaaq pilersinneqassooq, kukkunersiuineq avataaniit ingerlanneqatillugu, soorlu Savalimmiuni internet-ikkut takuneqarsinnaasartoq ippassaq aningaasat sumut atorneqarsimanersut,

Demokraatit siulittasuat, Jens B. Frederiksen oqarpoq.