Ilassinninnermut aningaasartuutit akisussaaffillu
Ilassinninnermut aningaasartuutit atornerlunneqarsimasut taarsiissutigineqarnissaannut Hans Enoksen kisimi akisussaasuuvoq.
Eqqartuussissuserisoq danskiusoq AG-mi ullumi saqqummersumi taama naliliivoq.
Johan Lund Olsenip, Josef Motzfeldtip Jørgen Wæver Johansenillu taarsiinissaat naalakkersuisut siulittaasuata taamaatitippaa – taavalu Rasmus Frederiksenip Jens Napãtûllu aningaasat utertitassaat ikilisillugit.
Eqqartuussissuserisoq, Gert Drews Jensen, Kalaallit Nunaanni pissutsinut aamma ilisimasaqarluartoq, isumaqarpoq, angutit pineqartut akiligassaannut tamanut Hans Enoksen imminut akisussaatilersoq.
Gert Drews Jensen AG-mut oqarpoq, ilassinninnermut aningaasartuutit pillugit maleruagassat paatsoorneqarsimaneri taama aalajangernermut tunuliaqutaasoq:
- Taarsiinissap atorunnaarsinneqarnissaanut illersuisup imaaliallaannarluni oqaaseqarsimanera tunngavigineqarsinnaanngilaq, eqqartuussissuserisoq oqarpoq.
Ilassinnissutinut aningaasartuutinut tunngassuteqartut eqqartuussissuserisumit nalilerneqarnerat tamakkerlugu AG-mi ullumi saqqummersumi atuarneqarsinnaavoq.
