Ilaquttat pillugit tunuarpoq

Qaanaami borgmesteri Johanne Nielsen tunuarniuteqarpoq.

Inuttut malersuinerit, Johanne Nielsen-illu ilaqutaanik ilanngussilluni malersuinerit unitsinniarlugit Qaanaami borgmesteri Johanne Nielsen aalajangerpoq tunuarniarluni. Tunuarniuteqarnerlu decembarip 22-ianili tunniunneqarsimavoq.

- Inuttut sakkortungaatsiarsimavoq ataatsikkut pisut. Siunissamilu taamatut pisoqaqqissappat nukissaqarfigisinnaasutut misigisimannginnama tunuarniarlunga aalajangerpunga. Uannut pisuutitsiniutit, kommunimi pissutsini taavalu atsiortitsinerit ingerlanneqarsimapput. Allaat allaffima igalaavi aserorterneqarsimallutik. Tamakku uanga akuerisinnaannginnakkit, allaammi meeqqakka ilanngussuunneqartalermata, tunuarniarlunga aalajangerpunga. Februarip aallaqqaataaniit borgmesteritut sulinngiffeqarallarpunga, taannalu kommunalbestyrelsep akuersaarpaa. Naatsorsuutigaaralu suliffikunnut teknikkeqarfimmut uteqqissallunga, Johanne Nielsen oqarpoq nangillunilu: - Naluneqanngitsutuut ukiuni 2005-imi 2006-imilu aningaasanik amingaartooruteqartumik ingerlatsisimavunga, kisiannili siulima aningaasanik aqutsinerliorsimaneri pisimanngikkaluarpata taamatut pisoqarsimanavianngikkaluarpoq. Qaanaap borgmesteria Johanne Nielsen taama oqarpoq. Johanne Nielsen, kommunalbestyrelsemi ilaasortaanera Pualut Kivioq-mit taarserneqassaaq. Kina borgmesterinngussanersoq Januaarip 30-ani paasinarsissaaq.