Ilaqutariit Sisimiut eqqaanni puussiarsuit qernertut 500-t ullut qulit ingerlaneranni katersoraat
Nerisassat puukui, puiaasaaqqat qassutikullu amerlapput.
Ilaqutariit Sisimiuninngaanneersut sineriammi eqqqakkanik asimiittunik qatsussilluinnarput.
Taamaammat eqqakkanik aasaanerani katersipput. Ilaatigut poorsuit bigbagsit kubikmeteringajattut angitigisut 25-t ulikkaarlugit katersisimallutik. Poorsuit bigbagsit puussiarsuarnik qernertunik 15-it 20-illu akornnanniittunik immerneqarsinnaapput.
Qassutikorpassuit aalisakkanullu karsit 40-t 50-illu missaanniittut aamma katersorsimavaat.
Nivip uumasoqatigiit nerisariiaaqatigiinnerat eqqarsaatigalugu eqqakkanik katersisarlutik erseqqissarpaa.
AAMMA ATUARUK Ilisimatuut plastikkiminernik Sullualummi nassaartut
- Microplastinngortaramik. Tamakkua aalisagaaqqat nerigunikkit aalisagaaqqallu aalisakkaniit allaniit nerineqarlutik ingerlaqqeqattaartaramik. Uagullu aamma kalaalimerngit nerisaratsigit tamakku tamatsinnut peqqinnaratik, Nivi Banemann oqarpoq.
Ataatani angaanilu ilagalugit eqqakkanik katersinissaminnut avatangiisinut aningaasaateqarfimmut taperneqarnissamik qinnuteqarput.
Avatangiisinut aningaasaateqarfik pinngortitami saliiniarlutik qinnuteqartunut tapiisartuuvoq.
- Eqqagassat assigiinngillat. Soorlu sodavandit puukui amerlasoorujussuupput, uuliat puukui nerisassallu puukui. Plastikkit taakku amerlapput. Aamma puttaqutikut, qassutit, qalukut allunaasallu pituutakut piiartarpagut. Nivi Banemann oqarpoq.
Pinngortitaq eqqakkanik ulikkaartoq nittarsaakkusunngilara
Nivip ataatani Jan Banemann, namminersorluni takornarialeriffiuteqartoq, eqqakkanik katerseqatigivaa.
Asimi eqqakkanik amerlasuunik annertuunillu takusassaqartuaannarnera taassumap qatsuppaa.
Jan Banemann takornarianik angallassilluni eqqagakorsuit kusanaagalugit, tamakkunannga avaqqutaaraluni takornariartitsisarsimavoq.
- Takornariat Kalaallit Nunaannut tikittaramik ingammik soorlu Nipisat maani Sisimiut eqqaanniittoq ornigartaqaat. Taava malugigakku, takornariat maannaraangamik sissami tamakku plastikkikujuit takullugit nuannarinngeqigaat, Jan Banemann oqarpoq.
Assi: Nivi Banemann
Nipisat Sisimiut kujataatungaanni qeqertaavoq inoqanngitsoq, Sisimiunut pingaarutilimmik oqaluttuassartalik.
Takornariat eqqakkanik asimiittunik katersisoqarsimatillugu eqqagassaarukkaangat nuannaartaqisut, Jan Banemann ilisimatitsivoq.
- Tamakku ornittarlugit nalunnginnakku ikani plastikkerpassuaqartoq, taava orninneq ajorpakka. Ilaa, takornariat takussannginnamikkit.
Bigbagsit 40-t siorna katersoraat
Ilaqutariit eqqakkanik ukiut aappassaat katersipput, bigbagsit 40-t ukioq kingulleq katersorsimallugit.
- Qeqqata Kommuniata Avatangiisinut Aningaasaateqarfiata siorna taperserpaatigut. Eqqakkanik katersisinnaanersunga kommuniminngaanniit aperimmannga akuersivunga, Jan Banemann oqarpoq.
Taanna eqqakkanik katersiumalluni kommunimut ukioq manna ornigussimavoq.
Assi: Nivi Banemann
Taamaalillutik ilaqutariit eqqakkanik katersinissaminnut 112.500 koruuninik tapiiffigineqarsimapput. Taakkulu aningaasartuutinut assigiinngitsunut atorpaat, ilaatigut eqqakkat puussaannut assigiinnngitsunut, nerisassanut, benzinamut allarpassuarnullu.
Coronavirusi peqqutaalluni takornarianik aasaq manna tikittoqanngimmat, Jan Banemannip eqqakkanik katersinissamut periarfissinneqaqqinnini nuannaarutigaa.
