Ilaqutariit pingasuusut nunatta kujataani annaanneqartut

Ilaqutariit pingasuusut tassa angut, arnaq meerarlu Narsamiit nunaqarfimmut Qassimiunut pingasunngornermi ingerlaarput.

Ilaqutariit ingerlaarneranni taarsivoq pujulerlunilu, taamaalilluni sila erseqqarikkunnaarluni.

Taamaalinerani ilaqutariit siku qernertoq aporpaat ilaqutariillu imaanut nakkarlutik.

Kalaallit Nunaanni Politiit tusagassiuutinut nalunaarummi allapput.

- Ilaqutariit qujanartumik annanniutinik atallaaqarput, angulli apornerminni ajoquserpoq. Ilaqutariit umiatsiaminnut imminnut ikiorlutik qaqipput, umiatsiamillu ingerlaqqissinnaannginnertik pissutigalugu VHF-radiortik atorlugu erngertumik ikiortissarsiorlutik, politiit allapput.

Ilaqutariit mayday-imik nalunaaruteqarput. Aasiaat Radioata nalunaaruteqarnerat tiguaa, namminerlu angallataatigineqartoq sukkasuumik qisuariarluni ilaqutariit ajutoorsimasut ikioriarlugit.

Ilaqutariit angallammik nassaarineqarput isumannaatsumukartinneqarlutillu tamatuma kingorna Qaqortuliaanneqarput.

Qaqortumut nalunaaqutaq 20.40 tikimmata Kalaallit Nunaanni Politiit ambulancillu ilaqutariinnik tigusinissaminnut piareersimapput.

Ilaqutariit napparsimmaviliaanneqarput anersaartorulunnerminnillu ajutoornerminnilu ajoqusernerminnik passunneqarlutik.

Ilaqutariit  ullumikkut ajunngitsut, politiit oqaatigaat.

- Tamanna atortorissaarutit eqqortut imaani ajutoornermi annannissamut qanoq iluaqutaasinnaaneranut assertuutissaavoq pingaaruteqartoq. Ilaqutariit annanniutinik atallaaqarsimanngikkaluarunik tamarmik imaanit qaqinissaat qularnassagaluarpoq, GPS-imillu sumiissusersiuteqanngikkaluarunik ikiortissamik takkuttoqarnissaa taama sukkatigisimanavianngikkaluarpoq, ilaqutariillu ajunaalernerminni kalerrisaarsimanngikkaluarunik immaqa nassaarineqarsimanavianngikkaluarput, politiit ikiortaat, Kalaallit Nunaanni Politiit pigaartuat, Nûno Larsen tusagassiuutinut nalunaarummi oqarpoq.

Ilaqutariit umiatsiaat sumiiffimmut qimaannarneqarpoq. Issittumi Sakkutooqarfiup umiatsiap sumiissusaa ilaqutariit qanigisaannut umiatsiamik ullumi aallertussanut ingerlateqqissimagaat politiit paasissutissiineranni allassimavoq.