Ilaqutariit nerisassaaleqisut

Ilaqutariit pingasunik meerallit, uiusoq suliffeqartoq arnarlu aalajangersimasumik akissarsiaqanngitsoq, aningaasatigut ajornartorsiungaaramik ullormit ullormut nalunngisaminnut ilaquttaminnullu aningaasanik atorniartariaqartarput.

Larsine Lundblad Frederiksen ima oqarpoq.

- Meeqqaakka isigalugit sussaqartinnagillu qiasunngunartarpoq. Nanertorneqartutullusooq misiginartarpoq, pingasunut anaanaasoq oqarpoq.

Aappariit pingasunik meeraqarput. Akullerli arfineq- marlunnik ukiulik aammik amigaateqarnermik nappaateqartoq nerisai immikkut nakorsamit nakkutigineqquneqarlutik.

- Maannakkoqqinnaaq maani panimma arfineq – marlunnik ukiullip nerisassallugu pisariaqartitaa yoghurt 1.liiteri 50 koruuneqarpoq. Panimma aakilliortup nakorsamit ulluinnarni inuup pisariaqartitaanik nerisaqaqquneqartup pisariaqartitaa aningaasaqarniarnitsinnut naammattusaarinareeqisumut erloqinarpoq, Larsine Lundblad Frederiksen napparsimmavimmi paarlattaalluni sulisartoq oqarpoq.

Ilaqutariit qaammammut aalajangersimasumik 9.000 koruunit missaanni illumut, ikummatissanut meeqqerivimmullu akiliisarput.

Ukioq naalersoq anaanaasoq meeqqaminik nerisassaqartitsinnginnami inunnik isumaginnittoqarfimmut ikioqqulluni saaffiginnippoq, ikiorneqanngilarli.

-Rekvisitionimik tunineqarpugut 900 koruunit sinnilaarlugit nalilinnik nerisassarsiutissatsinnik, ukiulli affaa qaangiummat aningaasat tunniunneqartut taarseqqullugit allagarsilluta. Ikiorneqarsorigaluarluni aningaasanik taarseeqqussummik pajunneqarluni nakeriallannarpoq, Larsine Lundblad Frederiksen oqarpoq.

Ilaqutariit meeqqaminnik nerisassanik pilersuinissaminnut killeqartitsiinnanngillat, tassami qallikkut atisassat aningaasakilliornikkut killilimmik pisiarineqartarput. Ilaqutariit meeraat angajulleq atuarfimmi atisarlunnerarneqarluni qinngasaarneqartarami sumiginnangaanermi kingorna imminornissaminik eqqarsaateqartarsimavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat