Ilaqutariit ikiorserneqarusupput

Ilaqutariit taakkua paniat USA-mi qaammatit marluk matuma siornagut ajutoornermi akuuvoq. Ajutoornerup kinguneranik paniat pisussinnaajunnaarpoq, maannalu Danmarkimiippoq sungiusarneqartussaagami, tamannali ilaqutariit namminneerlutik akilertussaavaat.

Tamanna attanneqarsinnaanngitsoq Ritap angutaa Poul Erik Christensen isumaqarpoq naalakkersuinikkullu akuliuttoqarnissa kissaatigalugu.

- Eqqumiiginartippara meeqqat inuusuttullu nunanut allanut atuariartortitavut sooq Namminersornerullutik Oqartussanit nalunaarsorneqannginnersut. Taamatut sakkortuumik ajutoortoqartillugu meeqqat 15-ileereersimanerannut malittarisassaq malinneqartariaqanngilaq, ajutoornermilu oqarasuaammik ingerlaannaq atuutilersussamik Kalaallit Nunaat atugassiisariaqarpoq. Tarnit pissusaannik ilisimasalimmik ikiortissarsiorsinnaasariaqarput, sulinermi annaasaqaatinik ikiorserneqarsinnaassallutik, angalaqataanissamut ikiorneqartariaqarlutik il.il.

Tassami tamakkuupput sakkortuumik ajutoortoqartillugu pisariaqartinneqartartut, inuusuttortavummi nunanut allanut atuariartortitavut sumiginnarsinnaanngilavut.

Qanormi pineqassappat aaqqissuussinerit AFS aamma EF aqqutigalugu aasamut nunanut allanut atuariartorniartut, taakkumi aallarnissaminnut nangaalerput, Namminersornerullutik Oqartussat sumiginnaasarmata, Poul Christensen oqarpoq, nangillunilu:

- Sillimmasernikuugaluarpugut, kisianni Ritamut sillimmaterput ataatsimoortumik EF-ip sillimmatigaa, taanna EF-ip aaqqissuussaanik nunarsuaq tamakkerlugu ilinniartunut atuuppoq. Ukiumullu atuarfiusumut atuulluni. Kisianni ajutoortoqartillugu ajutoornermiit qaammatit marluinnaat sillimmasiineq atuuppoq. Tassa qaammatit taakkua marluk ingerlaneranni angajoqqaat imaluunniit ilagisat qaninnerpaat angalanerat akiliunneqarsinnaavoq. Aamma ajutoortup nunagisaminut angerlarnera akiliunneqartussaavoq.

- Kisianni Kalaallit Nunaanni najugaqaratta Ritalu maani ikiorserneqarsinnaannginnami Danmarkiliaanneqartariaqarpoq. Tassa maanna sillimmasiisarfiup Kalaallit Nunaannilu inatsisit akornanni nalorninartorsiorpugut, tassami Kalaallit Nunaat akileerusunngimmat, Poul Erik Christensen oqarpoq.

Rita Christensen ikiorserniarlugu internetikkut atsiornernik katersilluni aallartittoqareerpoq.