Ilaqutariit annaanneqartut
Ilaqutariit sisamanik inuttallit angallataat Arsuup eqqaani minutsialunnguit ingerlaneranni kivimmat sakkutuut angallataat annaassiniarpoq, taama Grønlands Kommando nittartakkamini allappoq.
Annaassiniarneq sapaatiummat pivoq. Ilaqutariit – aappariit marlunnik meerartallit - ikkarlinnerminni sukkasuuliaat immalersimavoq. Ajunaalernermik kalerrisaarineq Aasiaat Radioatigoortoq Kangilinnguani sakkutooqarfimmit tusarneqarpoq, ilaqutariinnillu ujaasineq aallartilluni.
Ilaqutariit sumerpiamiinnerlutik oqaatigisimanngimmassuk, nalunaaquttap akunnerini pingajuata qeqqani ujaasineqareersorlu, ajunngitsut Arsuup eqqaani nassaarineqarput.
Angallataat ikkarlikkamik minutsit sisamaannaat ingerlaneranni kivisimavoq, ilaqutariillu gummibådimik nunamut ikaarsinnaasimapput.
Ujaasinermi sakkutuut umiarsuaaraat Agpa angallatillu Arsummit Qaqortumeersullu allat peqataapput. Ujaasinerlu politiit suleqatigilluinnarlugit ingerlanneqarsimasoq nalunaarutigineqarpoq.
