Ilaqutariinnut sullissiviit pingaarutilittut nalilerneqarput

Ilaqutariinnik sullissiviit aaqqissuussaanerat suliniutaallu maannakkut assigiinngissuteqarput, taamaattorli ilaqutariit suliniarfigineqarnerat aamma illoqarfinni suliniuteqarfiusuni ilaqutariinnik sullissiviit immikkoortortanik assigiinngitsunik suleqateqarnermikkut iluaqutaanertik assigiissutigigaat, Ilaqutariinnermut Naalakkersuisoqarfimmit oqaatigineqarpoq.

Nuna tamakkerlugu meeqqanut inuusuttunullu iluaqutaasumik, ilaqutariinnut suliniarnerup qanoq ineriartortinneqarsinnaanera nukittorsarneqarsinnaaneralu, naliliinermi ilaatigut innersuussisoqarpoq.
 
Taama suliniuteqarniarneq Akileraartarnermut atugarissaarnermullu isumalioqatigiissitap innersuussutaanut naapertuuppoq.
Ilaqutariinnimmi sullissiviit ungasinnerusoq eqqarsaatigalugu  aamma ataatsimoortumik suliniuteqarnissami pingaarutilittut inissisimanissaat isumalioqatigiissitap innersuussutigaa, meeqqat pitsaasumik toqqissisimanartumillu ineriartornissaat taamaalilluni qulakkeerneqarsinnaaniassammat.

Ilaqutariinnik sullissiviit qulingiluaasut Namminersorlutik Oqartussanit aningaasaliiffigineqartartut kikkunnulluunniit attuumassuteqanngitsunit nalilerneqarnerat  siunnersortimit avataaneersumit ph.D.-mik ilinniagalimmit Christina Warrer Schnohrimit suliarineqarpoq.

Nalunaarusiaq tusagassiortunik katersortitsinikkut ullumi saqqummiunneqassaaq.