Ilaatigut teknologiimut 9 millioni koruunit
Ministerrådi katillugit 9 milioni koruuninik tapiivoq, suliariniakkallu taperneqartut marluk kalaallinit ingerlanneqartussaapput, allallu aamma Nunatsinnut sunniuteqartussat taperneqarlutik.
- Suliariniakkanut taakkununnga tapiineq Nordisk Ministerrådimi ataatsimiittarnitta inerneraat, taamatut Naalakkersuisoq Palle Christiansen, nunani avannarlerni suleqatigiinnermut aallartitaasartoq oqarpoq.
Suliniutini marlunni taperneqartuni teknologi nutaaq atorluarniarneqarpoq; aappaa eletroniskimik issittumi nunap assigata, silaannaap pissusaata allanngoriartornera pissutigalugu allanngorartuartup malinnaaffigisinnaanissaa pillugu suliniutaavoq, aappaalu qarasaasiaq atorlugu oqaatsinik ilinniartitsinermut tunngasuulluni. Tassani qarasaasiaq atorlugu oqaatsinik ilinniartitsineq, ukiorpaalunni samit misilittagaqarfigisaat aallaavigalugu Oqaasiliorfimmit ineriartortinniarneqarpoq.
Issittumi nunat peqqinnissamut naalakkersuisuisa Nuummi qaammatip tulliani, issittumi peqqinnerulernissaq pillugu isumasioqatigiinnissaat, 200.000 koruuninik taperneqarpoq. Isumasioqatigiinnermi immikkut ilisimasallit isummersuutaasinnaasunik naalakkersuisunut saqqummiussissapput.
Suliniut ataaseq Nordisk Ministerrådimit taperneqarnerpaajulluni 500.000 koruuninik taperneqartoq tassa suliniut, Vestnorden Foresight 2030. Nunatsinni, Savalimmiuni Islandimilu nunaqarfimmiut siunissami inuuniarneranni atugassarititaasussat pillugit isummersueqatigiinnissaq tassani suliniutigineqarpoq. Suliniut taanna Ineqarnermut, Attaveqarnermut Angallannermullu Naalakkersuisoqarfimmit siornali piareersarneqarpoq.
