Ilaasussat Avannaaneersut aqagu Danmarkiliarsinnaassapput
Københavnip timmisartunut mittarfia timmisartukkut angallassinermut pingasunngornermut unnuaaniit ammaqqinneqassaaq, tassalu imaappoq, Air Greenland Atlantikoq qulaallugu pingasunngorpamiit timmisartuusseqqilissalluni.
Ilaasulli Kangerlussuup avannaanukartut Sisimiunukartullu taamaallaat aqagu timmisartumut Danmarkiliartartumut qilanaarsinnaapput.
Tassami Kangerlussuarmiit kujammut silaannartaq aqagu suli timmisartuussinermut matoqqagallassaaq. Air Greenlandip taamaattumik maannakkorpiaq Danmarkimi Kalaallit Nunaannilu ilaasut avannaamiut attaveqarfigiortorpai, taamaalillutik taakkunannga sapinngisamik amerlanerpaat Københavnimiit aqagu nalunaaqutaq 09.40 Air Greenlandip timmisartorsuanut Boeing 757-imut ilaasinnaaniassammata aqagulu ualikkut Danmarkimut uterlutik.
Tamatuma saniatigut Air Greenland pingasunngorpat Airbus 330-mik Pituffimmi Amerikami sakkutooqarfiannut nalinginnaasumik attartussaaq.
Akerlianilli Københavnip Narsarsuullu akornanni timmisartornissatut pilersaarut taamaatinneqarpoq, aamma Kangerlussuarmiit Kangerlussuarmullu kujammut ilaasunik timmisartuussisoqassanani, innermik anitsisup qullaatsitai pissutaallutik Kalaallit Nunaata kujataata affaata timmisartuussivigineqarnissaa ajornavimmat.
Ilaasut ingerlariaqqissinnaajunnaarsimasut Kalaallit Nunaata Danmarkillu akornanni inissaminnik utaqqisut Air Greenlandip qarasaasiakkut nittartagaa aqqutigalugu paasissutissinneqartuassapput, tassani Air Greenlandip pingasunngornermi nunatta nalunaaqutaa malillugu ulloqqeqqata siornatigut allanik paasissutisseeqqinnissani ilimagimmagu.
Air Greenlandimi massakkut ilaasut sapaatip-akunnerani kingullermi taamaatitsiinnarnernit eqqugaasut 1.500-t missaaniittut ingerlatseqatigiiffiup oqaatigaa.
Air Greenlandip arfininngornermi apriilip 24-ata tungaanut angalanissanut sullitaminut billetsit akiinik suli utertitsisinnaaneq periarfissaatippaa, aammattaaq tamatumani billetsit killilikkat pineqaraluarpataluunniit. Tamanna qarasaasiakkut nittartagaq www.airgreenland.gl aqqutigalugu toqqaannartumik pisinnaavoq.
