Ilaasussaagaluit 1000-it sinneqartut eqqorneqarput
Air Greenlandimi saqisunut aquttuusut atlantiku qulaallugu ullumikkut timmisartuussinerni saqissapput. Taamattaaq Nuummiit Kangelussuarmut utimulli ingerlanissat pilersaarutigineqarpoq, Kangerlussuarmiit Ilulissanut utimullu timmisartuussinerit marluk ullumikkut aamma pilersaarutigineqarput. Ilaasussaagaluit 1000-it sinneqartut timmisartuni saqisut suliumajunnaarneranni eqqorneqartut Air Greenlandimit naatsorsuutigineqarpoq.
Jørgen Erik Andersen, Air Greenlandip timmisartuussinissanut aqutsisoqarfianiit ima oqarpoq:
- Københavnimiit timmisartorsuaq Norsaq ullaap tungaa aallartissinnaasimavarput, saqisut immikkut isumaqatigiissusiorfigineqarsimasut inuttaanerisigut. Timmisartorsuaq ulikkaarpoq 245-nik ilaasoqarluni maanna Kangerlussuarmut ingerlaarpoq, taama Jørgen Erik Andersen Air Greenlandimeersoq ilisimatitsivoq.
- Kalaallit Nunaanni angallannermut immikkoortortami saqisunut aqutsisumik ataatsimik ullumikkut sulisoqarpugut. Saqisut aqutsisuat iluaqutigalugu timmisartuussinernik Norsaq-mut attaveqaateqartussanik pilersaaruteqarpugut, Jørgen Erik Andersen oqarpoq.
Air Greenlandip Nuummiit kangerlussuarmut uterlugulu ullumikkut ataasiarluni timmisartuussinissamik pilersaaruteqarpoq, Ilulissanut kangerlussuarmut uterlugulu marloriarluni timmisartuussissaaq.
Saqisut suliumajunnaarnerannit ilaasussaagaluit eqqorneqartut Danmarkimiittut ilanngullugit 1000-t sinneqalersimanissaat Air Greenlandip naatsorsuutigaa.
Jørgen Erik Andersenillu maannangaaq oqaatigisinnaanngikkallarpaa ilaasut qaqugu ingerlaqqissanersut, neriuutigilluinnarluguli suliumajunnaarneq ullumikkut aaqqiivigineqassasoq.
Jørgen Erik Andersenip Air Greenlandimi pisortaaneq Michael Binzer sulisut sinniisaannut attaveqarnerarpaa.