Ilaasortat siulittaasoq qinissavaat

Partiimut ilaasortat suli akunnerup ataatsip affaatalu ingerlanerani sumiiffinni assigiinngitsuni qinersiartorsinnaapput. Qinersineq qanoq soqutigineqartiginersoq paasiniarparput.

Siumumi allatsi Mikael Petersen oqarpoq.

Nuummi ukioq 2007-p naanerani ilaasortat 85-iupput, ullullu ingerlanerani nutaat ilaasortanngoriartuutaa siulittaasussamik qinersiartortarput.

Soqutiginninneq Qaarsuni aamma malunnarpoq. Qaarsut 200-t missaani innuttaqartoq Siumup 70-inik ilaasortaatitaqarfigaa. Ualisorlu tallimanut ilaasortat 50-it sinnillit siulittaasussaminnik taasereersimapput.

- Ippassaq ullumilu ilaasortartaarpugut, ilaasortat akornanni Aleqa Hansilu soqutigineqartorujussuupput, Qaarsuni siumup immikkoortortaqarfiani siulittaasoq, Karl Tobiassen oqarpoq. Siulittaasussamullu taasinermi suna eqqumaffigineqarnersoq apeqqutigineqarmat, assigiimmik akeqartitsinermik atorunnaarsitsinerup aaqqiivigineqarnissaanik oqariartorneq, ilaasortat akornanni ullup ingerlanerani siulittaasumik qinersiartunngitsiarnermi isummanik allanngortitsingaatsiarsimasoq.

-Taamaammat pissanganarpoq taasineq naammassippat kina siulittaasussatut qinigaanerpaanersoq, Karl Tobiassen oqarpoq.

Qeqertarsuarmi siumut ilaasortaasa 50-iusut affaat tallimanut taasereersimapput. Immikkoortortaqarfimmilu siulittaasup Ove Berthelsenip oqaatigisinnaannginnerarpaa, ilaasortat qanoq isummersornersut.

- Isumaat assigiinngitsorujussuupput, toqqissisimanarporli siullermeerluta siulittaasumik taaseqataasinnaagatta, tamannalu ilaasortanit soqutigineqarluarpoq, Ove Berthelsen oqarpoq.

Toqqaannartumik qinersinerup inerneri Siumup nittartagaani siumut.gl-imi unnugu nalunaaqutaq qulingiluat kingornagut takuneqarsinnaalissaaq.