Ilaasortat 60-it SIK-mit anipput
Nunatsinni Mittarfeqarfinni qatserisartut timmisartulerisartullu 60-it isumaqatigiinniarnerit kingulliit ima naammaginngitsigaat, allaat maanna ingerlaannartumik SIK-mut ilaasortaajunnaarsimallutik.
Maanna mittarfeqarfinni qatserisartut 60-iusut akissarsiatik sulinermilu atukkatik pillugit nammineerlutik isumaqatigiinniarsinnaaneq tigorusuppaat. Tusagassiuutinut nalunaarumminni taama allapput.
Sermitsiaq naapertorlugu SIK-p ilaasortai taakku 60-iusut ilaasortaajunnaarput, isumaqatigiinniarnermi kingullermi qaammammusiaqalernissamik kissaateqarnertik akuerineqanngimmat. Isumaqatigiinniarnermimi nalunaaquttap akunnermusiaqaannarnissaat aalajangiusimaneqarmat.
- Ukiuni arfineq-pingasunngortuni Mittarfeqarfinni sulisut sulinerminni atukkamikkut pitsanngorsaatissamittut siunnersuutigisartagaat SIK-mit angusaqarfigineqartarsimanngillat, sulisartut 60-iusut tusagassiorfinnut nalunaarumminni allapput.
