Ilaasortanik anisitsineq atortussaajunnaarsinneqarpoq
I-version Demokraatit
Demokraatit immikkut ittumik ataatsimeersuarnerat, pissanngatigalugu utaqqineqartoq, arfinernut Nuummi Hotel Hans Egedemi aallartippoq.
Oqaluuserisassat katillugit qulingiluaapput, Demokraatillu siulittaasortaarnissaat oqaluuserineqartussanut qinersissutigineqartussanullu ilaavoq.
Mads Lynge ataatsimeersuartunik malinnaavoq imalu paasissutissiivoq:
- Ataatsimeersuaqataasut aqqaniliupput. Tassa immikkoortortaqarfinniit arfinillit peqataapput, siulersuisuunernilu ilaasortat tallimat.
Siuleruisuunerniit peqataasut tassaapput: Jens B. Frederiksen, Palle Christiansen, Astrid Fleischer Rex, Karen M. Lynge kiisalu Ane-Marie Schmidt Hansen.
Siulersuisuunerni ilaasortat Karen M. Lyngep, Astrid Fleischer Rexip aamma Jens B. Frederiksenip Nuummi Demokraatinit ilaasortaajunaarsinneqarnerat naqissuserneqassanersoq oqaluuserisassat ilagaat.
Aamma Nuummi immikkoortortaqarfiup malittarisassanut allannguutissatut siunnersuutaa oqaluuserisassanut ilaavoq. Tamakkulu pereerpata siulittaasussamik qinersisoqassaaq.
Immikkoortortaqarfiit illoqarfinnit ukunaneersut peqataatitaqarput: Qaanaaq, Upernavik, Uummannaq, Ilulissat, Aasiaat, Sisimiut, Qaqortoq, Narsaq aamma Nanortalik.
Nuuk peqataatitaqanngilaq aamma Tasiilaq peqataatitaqaraluarluni taasisinnaatitaanngilaq.
Inatsisartuni ilaasortaq Jens B. Frederiksen siulittaasumut qinigassanngortippoq. Maannamullu siulittaasuusup Per Berthelsenip peqataanissaa suli nalornissutigineqarpoq. Taanna ippassaq tusagassiortunik katersortitsinermini peqataaniarani nalunaarpoq.
Siulittaasumik qinersinermut atatillugu sukumiinerusumik paasisaqarusukkuit unnuup ingerlanerani nittartakkatsinnut, knr.gl-imut alakkaasinnaassaatit, imaluunniit aqagu ullaakkut radioaviisimi tamanna tusarliunneqarumaarpoq.
