Ikummatissat aqagumiit 30 ørinik akikillissapput
Dieseli, beziina, petroliu aamma timmisartut ikummatissaat tamarmik 30 ørimik akilillissapput.
Qaammatip pingasuinnaat matuma siorna, ikummatissat akitsorlugit maajip aallaqqaataani qaffanneqarput 58 ørimik.
Taamanerniilli, tassa qaammatini maajimi juunimilu ikummatissat akii nunarsuatsinni akigitinneqartartut 20 procentimik appariarsimapput.
Taamaattorli piffissami maajimi juunimilu dollarip naliga misinnartumik qaffariarsimavoq, tamannalu KNI-mut iluaqusiiginnarsimavoq, tassami KNI dollariuteqarluarmat uuliallu akiata appariarnera iluatsillugu, 2012-ip sinneranut uuliap akia, isaasalerlugu "parnaarlugu" sillimmasersuutisisoqarmat, ikummatissap literimut akia 30 ørimik appartinneqarsinnaalersimavoq.
Aqagumiit ikummatissaq pisiaq 5 koruunit 85 øørinillu akeqalissaaq. Ikummatissaq ullumikkut 6 koruunit 15 ørinillu akeqarpoq.
Qallunaat Nunaanni benzina 13 koruunit 16 ørinillu akeqarpoq, taama akisutigaaq akitsuutit assigiinngitsut akimut ilanngunneqartarmata.