Ikummatissat akii qaffapput
Ikummatissat akiisa qaffannaaveersaartinneqarnerat ingerlatiinnarneqarsinnaajunnaarpoq, maannalu qaffanneqartariaqalerlutik. KNI A/S-imi pisortaaneq Søren Lennert Mortensen tusagassiuutinut taama allappoq.
Allattoq Louise M. Kleemann
juunip 30-at 2008 07:02
Ikummatissat akii 50 oorimik ullumimiit atuutilersussamik qaffanneqassapput.
Solaari, imaluunniit dieseli liiterimut 4 koruunit 22 ooreqalissaaq, petroleu liiterimut 4 koruunit 32 ooreqalissalluni, kiisalu benziina liiterimut 4 koruunit 22 ooreqalissalluni.
Naak ikummatissat akii liiterimut 50 oorimik qaffanneqaraluartut, akit atuisartunut atuuttut naalagaaffeqatigiinnerup iluani suli appasinnerpaajupput.
Biilip orsussaa dieseli liiterimut Danmarkimi 6 koruunit 34 oorillu missaanni akeqarpoq, momsi akitsuutillu allat ilanngunnagit.
Savalimmiuni liiterimut 7 koruunit sinnerlugit akeqarluni.
Ikummatissat pingaarnerit assigiinngitsut akii KNI A/S-imit Polaroilimiillu malittarineqarput.
