Ikummatissat akii januaarip aallaqqaataani qaffanneqassapput

Nunarsuarmi uuliap akiata qaffakkiartornera pissutigalugu ikummatissanut akigitinneqartut aappaagu januaarip aallaqqaataaniit atuutilersussamik qaffanneqassapput.
Allattoq Mads Lynge
decembarip 30-at 2010 16:51

Katillugit 20 oorinik qaffaasoqassaaq, isertitat Nunatta karsianut nakkartussat KNI-mullu nakkartussat avinneqassammata.

Ikummatissanut akit kingullermik februaarip qulingiluaani 2009-mi qaffanneqarput.

Nukissiornermi ikummatissat Inatsisartut avatangiisinut akitsuusiinerat januaarip aallaqqaataani atuutilissaaq, taamaalillunilu Polaroilip atuisartunut akigititai naliginnaasut qaavisigut liiterimut 10 oorinik akitsuuserneqartussaapput, Nunatta karsianut nakkartinneqartussamik.

KNI tusagassiutinut nalunaarummi taama allappoq.

Gasolie/diesel liiterimut 4 koruunit 47 ooreqalissaaq, benziina liiterimut aamma 4 koruunit 47 ooreqalissalluni, petroleumilu liiterimut 4 koruunit 57 ooreqalissalluni.

Timmisartunut Jet A-1 liiterimut 4 koruunit 49 ooreqalissaaq, akillu tassa aappaagu januaarip aallaqqaataaniit atuutilissapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq