Ikumatitaq Tibetimut apuutissaaq
Olympiadep innera Athenimiit nunarsuaq kaajallallugu ingerlaartinneqaramili perulluliuutaaqisumik Kinami illoqarfiit pingaarnersaannut Beijingimut – uakiaru Olympiaderfiusussamut – ingerlaartinneqarpoq.
Tibetimi illoqarfiit pingaarnersaat Lhasa marsip ulluisa 14-ianni sakkortoqisumik akersuuffiuvoq tassani, Kinamiut sakkutuui Tibetillu namminersulernissaanik illersuisut akersuummata.
Tibetimi anersaakkut siuttup Dalai Lamap Norbulingka-mi aasarsiortarfia ikumatitamik ingerlaarfigineqaqqaassaaq, ikumatitamik tigummiartut 11 kilometerinik isorartutigisoq ingerlaarfigissavaat Tibetimi qullersaasut angerlarsimaffiat Potala Palace apuuffigissallugu, taama avisi China Daily oqarpoq.
Ikumatitap Tibetimiinnerani akerlissutsimik takutitsinersuaqarnissaa aarleqqutigineqarmat isumannaallisaaneq nakkutilliinerlu annerpaaq aqagu annerpaaffissaaniitinniarneqarpoq.