Ikumatitaq pillugu San Fransiscomi isumannaallisaalereerput

Ikumatitap ullumi tikiunneqarnissaanut San Franciscomi pisortat isumannaallisaanissaminnut tullinnguupput. Akerliussutsimimmi takutitsinerit ippassarli aallartereermata.

Londonimi Parisimilu pisutuut aamma San Franciscomi ikumatitamik ingerlassisussat politiinit paarineqarlutik ingerlanissaat saneqqunneqarsinnaanngilaq. Ikumatitamik tigummiartut Tibetimi pissutsit Kinamilu inuit pisinnaatitaaffiisa unioqqutittuarnerat pillugit akerliussutsimik takutitsisorpassuit akullutaarniarsaralugit ingerlasussaassapput-aasiit. Amerikami ikumatitamik ingerlatsisussat ilaat takkorpiaat pissutigalugit piumajunnaarsimavoq.

San Franciscomi Kinamiut aallartitaqarfiata silataani arlalinnik untritillit ippassaq akerliussutsimik takutitsipput, inuillu pisinnaatitaaffii illersorniarlugit suliniaqatigiit ullumi akerliussutsimik takutitsinissamut kajumissaaripput. Akerliussutsimik takutitsisut katerisimaartarnissaat pilersaarusiorneqareerpoq, ilaatigut Nobelip nersornaasiuttagaanik nersornaasigaq, Afrikami Kujallermi palasi, Desmond Tutu, isiginnaartitsisartorlu, Richard Gere. Richard Gere oqarpoq naalagaaffiit siuttuisa ilungersunartunik ajornartorsiortoqarnera miserratigiunnaartariaqaleraat, avoqqaarliuteqaratillu Kinaliarnissaat nangaasaarutigalugu. Australiami naalakkersuisut siulittaasuat, Kevin Rudd Beijingimi ilinniarnertuunut ullumi oqalugiarnermini, Kinami naalakkersuisut inuit pisinnaatitaaffiinik naapertuilluarnerulernissaat kaammattuutigaa. – Tibetip namminersulernissaa tapersersornianngilarput, ajornartorsiutilli qaangerniarlugit Kinami pisortat Tibetimiunik isumasioqateqartalernissaat kaammattuutigalutigu, Australiami naalakkersuisut siuttuat, Kevin Rudd oqarpoq, Beijingimilu Olympiadeqarnerup aallartinnersiorneranut peqataassamaarnerarluni.

Ikumatitaq San Fraciscomiit Argentinami illoqarfiit pingaarnersaannut, Buenos Aires-imut ingerlanneqartussaavoq, unnia aamma tassani akerliussutsimik takutitsissamaalereersut.