Ikuallannermi eqqugaasut vandrehjem-imut inissippaat
- Qujanartumik takornariaqarpallaarnanilu ataatsimeersuartoqarpallaannginnera eqqorlugu taakkua Hotel Hvide Falkimut ingerlaannartumik inissinneqarallarput, vandrehjemimullu tamarmik ataasinngornermi aamma inissinneqarlutik, Inissiaateqarfimmi A/S Ini-mi attaveqaqatigiinnermut pisortaq Else Løvstrøm oqarpoq, vandrehjemimullu inissiinerit tunuliaqutaat nassuiaateqarfigalugu.
- Sillimmasiisarfiit piumasarisaqaatigisarpaat taamatut aqqusaagaqartut sapinngisamik akikinnerpaamik inissinneqarnissaat, ataasinngornermilu ulluinnanngoriarmat vandrehjemimut inissinneqarnikuupput, Else Løvstrøm oqarpoq.
Vandrehjemimut inissiisoqarsinnaanngippat eqaarsaartarfinnut assigisaannullu inissiisoqarsinnaanissaa sillimmasiisarfiit piumasarisarpaat.
Inissiat katillugit 15-it ikuallannermit eqqorneqarput, taakkunani ineqartut marluk ilaquttaminni namminneq inissikkusussimallutik, aqqaneq-marluk hotelimi inissinneqarnissartik akuerisimallugu, aalisartorlu ataaseq avataasiortoq illoqarfimmiinngitsorlu eqqugaalluni.
Inuit allat marluk napparsimmavimmut innartinneqarput, peqqissusaat misissorneqassammat.
Inissiat eqqorneqartut innaallagiaqalereerput, imermillu pilersorneqaqqilernissaat maanna sulissutigineqaleruttorluni. Najugaqartulli iniminnut qaqugu iserteqqissiinnaassanersut nalunarallarpoq.
- Inissiat allerniittut ISS suleqatigalugu suliarineqareerpata tassani najugallit siulliullutik isertersinnaassapput, kisianni inissiat qulliit sivisunerusumik sukumiinerusumillu suliassaammata, tassani najugallit sivisunerusumik angerlarsimaffimmi avataaniinnissartik naatsorsuutigisariaqassavaat, Else Løvstrøm oqarpoq.
Atersuarni ikuallattoqarmat angut 46-nik ukiulik ajunaarpoq, toqusullu timaannik misissuisartoq ikuallassimasunillu paasiniaasartoq maanna Ilulissaniipput. Ikuallannermulli suna aallarniutaasimanersoq suli erseqqissumik paasineqanngilaq.
Inissiani ikuallattoorfiusuni najugallit Qaasuitsup Kommuniata inunnik isumaginnittoqarfianit ikiorneqarnissaminnik neqeroorfigineqarsimapput.
