Ikuallanneq timmisartorsuarmit qaminniarneqarpoq
Timmisartoq Boeingimeersoq imermik 76.000 literimik ikuallattumut qatserutissamik useqarsinnaavoq.
Timmisartoq ikuallattunut qamisaatitut atorneqartartoq, illoqarfiup Haifap eqqaani orpippassuarnut ullut unnuallu sisamassaa ikuallattunut qatseriartortinneqarpoq.
Ikuallanneq assigiinngitsuni suli ikumavoq. Taamaattorli ataatsimut isigalugu qamissinnaanissaa neriunartoqarpoq, Israelimi naalakkersuisut oqaaseqartitaat ilaatigut taama oqarpoq.
Taamatut neriuuteqarnerannut anoraarukkiartornera aamma unnummut aqaguluunniit siallilernissaa pissutaapput.
Ikuallanneq sisamanngormat aallartimmalli 41-t ajunaarput, 17.000-illu qimarngussuunneqarlutik.
Maannamut orpippassuit 5.000 hektariusut 5 millioninik orpittallit, Haifap kujataani qaqqani Carmelini ikuallagussaareerput.
Israel nammineerluni orpippassuarnut ikuallattunut qatserutinik peqanngimmat nunani allamiut ikiuuttariaqarsimapput. Taamaalilluni timmisartut qatserisartullu nunani assigiinngitsunit qulineersut qatserinermi ikiuupput.
