Ikuallanneq ingasappallaarunnaassagunarpoq

Grækenlandip oqalutuarisaanerani aatsaat taama annertutigisumik ikuallattoqarpoq, suulli tamarmik iluatsissappata ikuallanneq ullumi immaqa ingasappallaarunnaassaaq. Anorlingaatsiarnera qatsoriartulersimavoq, qatserisartullu sulinertik aqulluarnerulerpaat. Nutaarsiassaqartitsivik Ritzau taama ilisimatitsivoq.
aggustip 29-at 2007 08:38

Inuit 64-it tallimanngormalli manna tikillugu ikuallagussaapput 3000-nillu amerlanerit angerlarsimaffeerullutik.

Nunaatillit eqqugaanerpaapput, naatitaammi oliivinnit, Grækenlandimi nerilluarneqartaqisut, sequmipput, savaasarpassuit savallu aamma toqorarlutik.

Aningaasaqarnermut ministereqarfimmit tusarfiit naliliipput, ikuallannersuaq 37 milliardi koruunit tungaasa nalinginut maannamut aseruatiterereersoq. Grækenlandimi ministeriunerup, Costas Karamanlisip, grækerit kajumissaarpai imminnut ikorfartoqqullugit, neriorsorpaalu angerlarsimaffii ikuallattut nutarterneqarumaartut, orpippassuarnillu ikkussuisoqaqqikkumaartoq.

Ikuallannersuaqartillugu ikiuiniaqatigiiffimmik pilersitsisoqarnissaa EU-p isumaliutersuutigaa. Timmisartunik, qulimiguulinnik, qatserisartut biiliinik qatserisartunillu Grækenlandiliartitsinissaq Europami nunat 15-it manna neqeroorutigereerpaat. Ajunaarnersuaqartillugu Europami aatsaat taama annertutigisumik EU ataqatigiissumik aaqqissuussivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq