Ikuallagussaalluni ajunaartoq kalaaliussangatinneqartoq
Angutip kinaanera politiinit qulakkeerlugu suli paasineqanngilaq, misissuinert suli naammassinngimmata. Næstvedimi politiini pigaartut ittuat Mikkel Kjærgaard KNR-imut taama oqarpoq.
Politiip uppernarsarpaa, ineqarfimmi ikuallattumi Svenstrupgaardimiittumi, angut kalaaleq 39-nik ukiulik septemberip aallaqqaataani attartortuulersimanera pillugu attartortitsisartup arnap oqaluttuarisimagaa.
Sjællandimi aviisip SN.DK-ip nittartagaani allaaserineqartoq naapertorlugu arnap inimik attartortitsisartup angut 39-nik ukiulik akimarpasissutut kusanartutut oqaloqatikkuminartutut pitsaasutullu oqaluttuaraa, angullu taanna inunnut allanut akulerutsinngitsuusoq.
- Inigisaani inunnik allanik takusaqarnikuunngilanga, arnaq inimik attartortitsisartoq aviisiip nittartagaani taama issuarneqarpoq. Ikuallattoqarneranik politiit unnuaq nalunaarfigineqarput DK-mi nalunaaqutaq pingasunut tanneq qulingiluanngulersoq.
Qatserisartut putsunut illersuutinik atortulerlutik inimut iseramik toqusimasumik nassaarput, politeeq Mikkel Kjærgaard oqarpoq,
- Ikuallagussaalluni ajunaartup aqagu kinaassusersinissaa neriuutigaarput, soorluttaaq ikuallannerup sumit aallartissimanera paasissallugu sulisugut, Mikkel Kjærgaard oqarpoq.
Naasorissaasut illorisimasaani ineeqqanik attartortitakkami Svenstrupgårdimi inuit 30-nik amerlanerusut najugaqarput taakkua inuiaqatigiinnit assigiinngitsuneersuupput.