ikorfartuisarneq amingaataavoq

Imminornermik nalaataqarsimasut ilaqutaasut qanigisaasullu oqaloqatigiisinneqartarnerini, nammineq kajumissuseq aallaavigalugu Nuummi ingerlanneqartarput, oqaloqatigiisitsisartorlu Arthur Lennert Kristiansen oqarpoq ikorfartoqatigiiffiit amerlanerusinnaasut.

-Suliniutit arlallit pioreerput, kisianni suliniutit suli amerlanerusinnaapput.

Taama oqarpoq Arthur Lennert Kristiansen. Nuummi najugalik, meeqqaminillu arlalinnik ilaatigut napparsimanikkut ajunaarnikkullu toqukkut annaasaqarsimasoq, aammalu qanigisaminik imminornikkut annaasaqarsimasoq Inge Poulsen oqarpoq, ikorfartoqatigiiffinni assingusumik misigisaqarsimasut oqaloqatigisarlugit iluaqutaasoq.

- Ikorfartoqatigiinniittarnera iluaqutigeqaara, aamma misigisimasat assigiittarmata, ikorfartoqatigiinniittarnera iluaqutigeqaara.

Taana oqarpoq Inge Poulsen. Nammineq kajumissutsiminik ikorfartoqatigiinnik ingerlataqartoq Arthur Lennert Kristiansen oqarpoq, ikorfartuisarnissaq pisariaqartinneqartorujussuusoq.

- Uanga misigisimavunga nunarsuarmi nunatsinnilu oqaloqatigiisitsisartut pisariaqartinneqartut amingaataasullu.

Taama oqarpoq nammineq kajumissutsiminik oqaloqatigiisitsisartoq, Arthur Lennert Kristiansen.

Nunatsinni ukiumut iminorsimasut agguaqatigiisillugit 50-iusarput.