Suliffeqarfiup kuultisiorfiup ammaqqissinnaanera misissuleraa
Nalunami piiaavimmi suli kuulteqarpa sanaartuutinik annertuunik pilersitsinissamut tulluarpa, akuersissuteqarfiusinnaallunilu aningaasanik isaatitsiviusinnaava?
Tamanna canadamiut suliffeqarfiutaata Alopex Gold Inc-p misissorusukkaa nittartagaanni atuarneqarsinnaavoq, Eldur Olafssonimu suliassamut ima oqaaseqarpoq:
- Aasaq manna suliassatsinnik nalunaaruteqarnera nuannaarutigaara. Sukkasuumik sulinissatsinni Nalunami kuultisiorfimmi kuulti misissorluarniarsarissavarput, Eldur Olafsson tusagassiutinut nalunaarummi nittartakkaminnut ikkusimasaminni taama allappoq.
Alopex Gold Inc-ip Nalunaq Gold Mine A/S Angel miningimit 2013-imi kuultip akiata appapiloorneratigut akilersuigunnaartumit pisiarisimagaa, aatsitassanut Naalakkersuisoqarfiup uppernarsarpaa.
Nalunaq A/S-imut akuerissutit Alopex Gold Inc-imit nanginneqarnissaat Naalakkersuisut akuerisimagaat, Naalakkersuisoqarfiup pisortaata, Jørgen Hammekenip KNR-imut oqaatigaa.
- Naalakkersuisut akuersissutit atorunnaarsinnissaat suliffeqarfimmilluunniit siullermik piginnittuanit arlalinnik ilaqartumit, islandimiunillu piginnittunit nutaanit ilaqartumit nanginneqassanersut aalajangersinnaavaat. Naalakkersuisoqarfiup pisortaa, Jørgen Hammeken oqarpoq.
AAMMA ATUARUK Kuultisiorfik Nalunaq ukiup naannginnerani matuneqassaaq
Kuulteqarluassappallu Alopex kuultisiorsinnaanngornissaanik tamanna isumaqanngilaq.
- Qanimut malinnaaffigissavagut. Qillereriarlutit misissorluagassaminnik angerlaassissapput. Kuulteqarluartorlu paasineqassappat assaanissamik nutaamik qinnuteqassapput, Hammeken oqarpoq.
Alopexip kuultisiorfimmi misissuinissaq sioqqullugu Taartup eqqaani Arsuup avannaani Sermiligaarsuup Taartullu kangerluanni aamma misissuerusuppoq.
Piffimmilu tassani Nunaoil A/S Greenexilu misissuinissamut akuersissuteqarnikuupput. GEUS naapertorlugu 90-ikkut naajartorneranni kuultinik tassani nassaartoqarnikuuvoq.
Nalunaq Gold Mine 2013-imi piginnittoq, Angel Mining akilersuinermik unitsitsimmat matunikuuvoq. Piffissami tassani 60-it missaanni sulisorineqarput.
Alopexip piffinni taakkunani sortaani qanorlu misissuiniarnera uani takusinnaavat:
