Naalakkersuisoq: ukiut 300-t nunasiaataasimanerput malunnartissinnaangilarput

Nunatta ajoqersuisumiit Hans Egedemiit tikinneqarneraniit ukiut 300-t arfininngorpat qaangiutissapput.

Taasungalu tunngatillugu nunatta Ilinniartitaanermut, kultureqarnermut, timersornermut ilageeqarnermullu naalakkersuisuat malunnartitsinissaminut pilersaaruteqanngilaq.

- Immaqa una siullermik akissuteqarfigisinnaavara malunnartitsinissamut immaqaluunniit nalliuttorsiornissamut naalakkersuisut ukua nutaat periarfissaqanngilagut immaqaluunniit taamaaliorsinnaanngilagut.

AAMMA ATUARUK Hans Egede pillugu nalliuttorsiornernik malinnaasut: Nalliuttorsiorusuttoqanngilaq

Ilinniartitaanermut, Kultureqarnermut, Timersornermut Ilageeqarnermullu naalakkersuisoq, Peter Olsen (IA) taama oqarpoq.

Taassuma oqarnera naapertorlugu malunnartitsinissamut aningaasaliisoqarnikuunngimmat nunasiaataalernitsinniit ukiut 300-t qaangiunerat malunnartinniarneqanngitsoq.

- Naluneqanngitsutuulli uagut aatsaat qanittukkut aallartippugut naalakkersuisuusimasullu suliaat kingornuppagut. Naalakkersuisullu siuliisa nalliuttorsiornissamut imaluunnit malunnartitsinissamut ukioq maannamut aningaasaliisimanngimmata taamaattumik uagut massakkut naalakkersuisuusugut tamanna peqqutigalugu annerusumik iliuuseqarsinnaanngilagut.

Malunnartinneqarsinnaanngilaq

Peter Olsen taama oqarpoq. Tassalu naalakkersuisut siorna aningaasamut inatsit suliarimmassuk aningaasaliisimanngimmata, arlaatigut malunnartitsinissamut pilersaarusiornissaminnik aningaasassaqaratik taanna nassuiaavoq.

Soqutigisaqartullu allat namminneq malunnartitsiniarnerat taassuma innersuuppai:

- Kisianni taamaallaat nalunngilara suliffeqarfiit assigiinngitsut malunnartitsiniartut nalunngilara, soorlu nunatta katersugaasivia taavalu nunatta isiginnaartitsisarfia ilisimalluarpara aamma ilaatigut pilersaaruteqartut taamatut malunnartitsinissaminnut. Isumaqarpunga tamakku suliat ajunngitsut uagut naalakkersuinikkut akuliuffigisariaqanngisagut.

AAMMA ATUARUK Hans Egede malunnartinneqassanngitsoq: Sianiilliornerullunilu eqqortuliorneruvoq

Malunnartitsinissamut aningaasaliisoqarsimagaluarpat, qanoq pilersaarusiorsimassagaluarpit?

- Tassa taanna naalakkersuisuni maannakkut annerusumik eqqartornikuunngilarput aamma isummerfiginikuunatigu, soorlu oqareernittuut naalakkersuisut siuliisa tamanna piareersarsimanngimmassuk massakkut taava uagut naalakkersuisut annerusumik isummerfiginngilarput aamma iliuuseqarfigisinnaasimanngilarput, immaqa taamatut oqaannaraanni pitsaaneruvoq.

Naalakkersuisoq isummersimanngilaq

Peter Olsen nunasiaataalernitsinniit ukiut 300-t qaangiunerannut malunnartitsinnginnissaq pillugu inuttut isummersuuteqanngilaq.

- Uanga nammineq inuttut imaluunniit naalakkersuisutut isumaga pingaarpallaanngilaq pissutigalugu uanga partii aalajangersimasoq immaqaluunniit naalakkersuisut sinnerlugit innuttaasunut tamanut naalakkersuisuugama. Taamaattumik uanga nammineq isumaga kisimi apeqqutaavallaanngilaq. Una oqaatigiinnassavara naalakkersuisut ajoraluartumik aningaasaliisoqarnikuunngimmat annerusumik eqqartornikuunnginnatsigu taamaattumik oqaaseqarsinnaanngilanga.