Aningaaseriviup pisortaanera: Kalaallit Airports sulinissaminut piffissaqartinneqarli
Nuummi Ilulissanilu mittarfiit tallilerneqarnissaannik Qaqortumilu nutaamik mittarfiliornissamik pilersaarutit oqallisaasupilussuusimapput aammalu ilaatigut Aningaasaqarnermut Siunnersuisoqatigiinnit Nationalbankenimillu isornartorsiorneqarsimallutik.
Naalakkersuisulli attaveqaatitigut suliniutip angisuup ingerlanneqarnera pillugu Grønlandsbankenimit maanna nersualaarneqarput.
Grønlandsbankenip ukiumoortumik nalunaarusiamini nutaanik mittarfiliortiternissamut aningaasalersuineq nalitsinni politikkikkut aalajangiinerit annerit pingaarnerillu ilaattut taavaa, aningaaseriviullu pisortaanera naapertorlugu inaarutaasumik aalajangiisoqarnissaata tungaanut sulineq Naalakkersuisut pitsaasumik eqqortumillu ingerlappaat.
- Kalaallit Airports piginnaasalinnik pisortalerneqarsimasutut isikkoqarpoq, taakkulu suliassat pisariaqartut maanna ingerlatileruttorpaat - inuiaqatigiit aningaasaqarnerannut sunniutaasussanik misissueqqissaarineq ingerlanneqarpoq, suliniutit pilersaarusiorneqarnerat qanoq akeqavissanersoq misissorneqarpoq, aamma aningaasalersuinissamut periarfissat misissorneqarput. Isumaqarpugullu suliap ingerlanneqarnera pitsaalluinnartutut isikkoqartoq, Martin Kviesgaard taama oqarpoq.
AAMMA ATUARUK Mittarfiliortiternermut aningaasalersueriaasissaq atoqqunngikkaa
Taamatullu oqarnera suliniutip ilaatigut Aningaasaqarneq pillugu siunnersuisoqatigiinnit ernumanartoqartinneqarneranut akerliuvoq, siunnersuisoqatigiimmi inuiaqatigiit aningaasaqarnerannut sunniutaasussanik misissueqqissaarinernik mittarfiit nutaat iluaqutissartaannik takutitsisinnaasunik ujartuisimapput.
Suliniutini allannguisoqarnissaa pisariaqalersinnaasoq
3,6 milliardit koruunit missaannik aningaasaliinerup kingunerisassaata sukumiisumik misissorneqarnissaa aningaaseriviup pisortaanerata isumaqatigaa. Kisitsisillu pigineqalerpata suliniutigineqartoq pilersaarutigineqartutut ingerlanneqassanersoq politikerit aalajangiiffigisussaassavaat:
Nutaanik mittarfiliortiternissamut suliap maannamut ingerlanneqarnera:
- Mittarfinnik arlalinnik sanaartortitsinissaq Inatsisartut 2015-imi ukiaanerani ataatsimiinnerminni akuersissutigaat.
- 2017-imi ukiaanerani ataatsimiinnermi aningaasanut inatsisip pingajussaaneerneqarneranut atatillugu Nuummi ilulissanilu nunani tamalaani mittarfiliornissamut kiisalu Qaqortumi nunap immikkoortuani mittarfiliornissamut aningaasalersuinissamut killiliussat pillugit aalajangiisoqarpoq.
- Aningaasanut inatsisip suliarineqarneranut atatillugu Naalakkersuisut Inatsisartut Aningaasaqarnermut akileraartarnermullu ataatsimiititaliaata akuerisaanik pisinnaatinneqarput Kalaallit Airports A/S-ip avataaneersunit 2 mia. kr.-it tungaannut taarsigassarsineranut qularnaveeqqusiinissamut, nunatta karsianit 2 mia. kr.-it tungaannut taarsigassarsinissamut, taakkulu Kalaallit Airports A/S-imut taarsigassarsianngorteqqillugit.
- Kalaallit Airports A/S Nuummi, Ilulissani Qaqortumilu mittarfinnik pilersitsinissamut Naalakkersuisunit 2017-imi novembarip 29-ani akuersissummik tunineqarpoq. Akuersissuteqarnermi piumasaqaatigineqarpoq Kalaallit Airports taarsigassarsinermi atugassarititaasut qularnaveeqqusiinerillu kiisalu suliariumannittussarsiuussinerup inerneranik Naalakkersuisunut akuerisassanngortitsilluni saqqummiussinissaa.
- Nuummi aamma Ilulissani nunani tamalaani mittarfiit kiisalu Qaqortumi nunap immikkoortuani mittarfiup sananeqarnissaannut aningaasalersorneqarnissaannullu killiliussatut piumasaqaatit pillugit Inatsisartut inatsisissaat 2018-imi januaarip 15-iani tusarniaassutigineqalerpoq. Namminersorlutik Oqartussat namminneq aningaasaliissutigisassaat kiisalu mittarfinnik pilersaarusiornermut, sanaartornermut ingerlatsinermullu aaqqissuussaanikkut killiussat inatsisissatut siunnersuummi aalajangersarneqarput.
Ingerlariaqqinnissaq:
- Nuummi aamma Ilulissani nunani tamalaani mittarfiit kiisalu Qaqortumi nunap immikkoortuani mittarfiup sananeqarnissaannut aningaasalersorneqarnissaannullu killiliussatut piumasaqaatit pillugit Inatsisartut inatsisissaat Inatsisartut upernaakkut ataatsimiinneranni aalajangiiffigineqassaaq. Mittarfiliortiternermi inuiaqatigiit aningaasaqarnerannut sunniutaasussanik misissueqqissaarinerit inatsisissatut siunnersuummut ilaatinneqassapput.
- Taarsigassarsinermi atugassarititaasut, qularnaveeqqusiinissamik pisumasaqaatit suliariumannittussarsiuussinerullu inernera Naalakkersuisut isummerfigissavaat.
- Taarsigassarsinermut atatillugu qularnaveeqqusiinissaq Inatsisartut Aningaasaqarnermut Akileraartarnermullu ataatsimiititaliaata isummerfigissavaa.
- Kalaallit Airports naapertorlugu aningaasalersuinissaq piareerneqarsimappat politikerinillu 2018-imi aasakkut akuerineqarsimappat Nuummi mittarfiup sanaartorfiginerata ukioq manna septembarip qaammataani aallartinnissaa ingerlatseqatigiffiup naatsorsuutigaa, Ilulissanilu Qaqortumilu sanaartorneq 2019-imi upernaakkut aallartissinnaassalluni.
- Mittarfiit pingasuusut 2022-mi ukiakkut naammassereersimanissaat naatsorsuutigineqarpoq.
Najoqqutarisaq: Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfik
- Aningaasatigummi ataqatigiissitsinissaq ajornakusoortoq paasineqassagaluarpat naleqqussaasoqartariaqarsinnaavoq. Tulleriinnerini allannguilaartoqassanersoq imaluunniit allatigut pingaarnersiuisoqassanersoq misissueqqissaarinerup inernerata takutikkumaarpaa. Isumaqarpunga ingerlatseqatigiiffiup siunnersortaasullu sulinissaminnut piffissaqartinnissaat pingaaruteqartoq, taamaaliornikkut politikkikkut aalajangiinissamut toqqammavissaq pitsaasuuniassammat, Kviesgaard taama oqarpoq.
AAMMA ATUARUK Naalakkersuisut 2,1 milliardit koruunit mittarfinnut aningaasaliissutiginiaraat
Attaveqaqatigiinnermut naalakkersuisoqarfiup nutaanik mittarfiliortiternermi inuiaqatigiit aningaasaqarnerannut sunniutaasussat, mittarfiliortiterneq pillugu inatsimmut ataatsimoortumut ilanngussorlugit maanna suliarileruttorpai. Inatsit taanna Inatsisartut upernaakkut ataatsimiinnerminni oqaluuserisussaavaat.
Tamatumunngalu peqatigitillugu Aningaasaqarnermut Akileraartarnermullu naalakkersuisoqarfiup aningaasalersuinermut tunngasumik suliassartaa aamma ingerlappaa. Aningaasalersuinissaq Naalakkersuisunit Inatsisartullu Aningaasaqarnermut Akileraartarnermullu ataatsimiititaliaannit akuersissutigineqartussaavoq.
