Eqqaasitsissut: Talittarfimmi biilinik uninngatitsineq inerteqqutaavoq
![](/sites/default/files/styles/image_934x467/public/article_images/kort_havn.jpg?itok=aW6Qc5ay)
Royal Arctic Line, Ilulissani umiarsualivimmi oqartussaaffimmik ingerlatsisuusoq, sillimaniarnermik peqquteqarluni Ilulissani innuttaasunut eqqaasitsissuteqarpoq talittarfimmi tamarmi biilinik qimatsineq inerteqqutaasoq.
- Ilulissat aalisartoqarfissuuvoq. Turisteqarfiulluni. Angallatinik ikuallattoqalersinnaavoq. Imaluunniit immakkut ajutoorsimasunik umiarsualivikkut tikiussisussanut biilit ajoqutaasinnaammata, taamaattumik tamakkua tamarmik eqqaasitsissutigineqaannarlutik taamatut ingerlatitsileqqilernikuuvugut, Jens Jørgen Nielsen, Ilulissani umiarsualivimmi akisussaasoq, oqarpoq.
Taamaattumik Avannaata Kommunia, talittarfimmi biilit uniffigisarsimasaanni tape-lersuilluni uninngatitseqqusiffiunnginneranik sapaatip akunnerani uani ataasinngornermit nalunaaqutsersuisimavoq.
Biiliutillillu Avannaata Kommunianit taarsiullugu talittarfimmit qullasinnerulaartumi, kommuunip saavani ulluinnarni ualikkut nalunaaqutaq sisamap kingorna imaluunniit sapaatip akunnerisa naanerani aamma Spar-ip saavani tunuaniluunniit biiliminnik uninngatitsisarnissaat.
Kommuunimiilli erseqqissaatigineqarpoq talittarfimmi biilinik usilersorneq usigiaanerluunniit inerteqqutaanngitsoq.
Naatsorsueqqissaartarfimmit kisitsisit naapertorlugit Ilulissani 2018-imi inuinnaat biilinik 371-nik biileqarpoq.