Inuiattut ullorsiorneq: Danmarkimi nalliuttorsiornerit

Inuiattut ullorsiornerput Danmarkimi illoqarfinni arlalinni ileqquusoq malillugu aamma nalliuttorsiutigineqassaaq. 

Pisortat allaffeqarfiini Erfalasutta ukiut aappassaanik amuneqarnerata saniatigut Kalaallit Illuutaanni soorunami aamma nalliuttorsiortoqassaaq.

Kalaallit Peqatigiiffiisa inuiattut ullorsiornermut pilersaarutaat peqatigiiffiit nittartagaanni aamma atuarneqarsinnaapput.

Taakkulu Kalaallit Illuutaasa nittartagaanni allaqqapput.

AALBORGIMI:

Inuiattut ullorsiorneq uumasuusivissuarmi Aalborg Zoomi Aalborgimi Kalaallit Illuutaat suleqatigalugu ukiut aappassaanik nallittorsiutigineqassaaq. Nunatsinnut attuumassutillit uumasuusivissuarmut akeqanngitsumik isersinnaapput. 

Nalliuttorsiorneq nal. 14 aallartissaaq. Ilaatigut oqalugiartoqassaq Erinarsoqatigiillu Ikinngutigiit aliikkusersuissapput.

Nunatta Angalatitsivia aamma aliikkusersuinermik ingerlataqassaaq, unnukkullu nammineq igaassanik nassarluni, immaqa siaasagassanik, iganissamut periarfissaqassaaq. 

Aalborgimi aaqqissuussineq uani paasisaqarfiginerusinnaavat.

AARHUSIMI:

Inuiattut ullorsiornerup nallittorsiutigineqarnera Aarhusimi Kalaallit Illuutaanni pinnani Aarhusip illoqarfiata qeqqani Ceres-byenimi VIA University Collegemi pissaaq.

Nal. 9.30 ullaakkorsioqatigiittoqassaaq. Ullaap tungaanilu pisussat ilagaat palasip Oline Berthelsenip naalagiartitsinera, atuakkiortup oqallissaarisartullu Nauja Lyngep atuakkiaminit "Ivalus color"-imit atuffassinera TIMP-illu isiginnaartitsinera.

Kristian Mikkelsen nipilersoqataalu Inuit Feet ualikkut tusarnaartitsissapput, Simon Lyngelu unnukkut tusarnaartitsissalluni.

Aarhusimi aaqqissuussineq uani paasisaqarfiginerusinnaavat.

ODENSEMI:

Odensemi peqatigiiffik Umiaq Kalaallit Illuutaanni ullaakkut nal. 8 ullaakkorsioqatigiissitsissaaq.

Inuiattullu ullorsiorneq Kalaallit Illuutaanni nal. 14 pisortatigoortumik aallartissaaq Nordatlantens Husip siulersuisuini ilaasortaq byrådimullu ilaasortaq Claus Houden oqalugiassalluni. Aamma Avalammeersunik oqalugiartoqassaaq.

Christian Søgaards trio & Ulf Fleischer ualikkut nipilersussapput meeqqanullu aamma aliikkutassaqartitsisoqassalluni.

Peqatigiiffik Umiaq nal. 18-imit naliuttorsiornerit nangissavai ilaatigut nereqatigiinnissamik periarfissaqartitsissalluni.

Odensemi aaqqissuussineq uani paasisaqarfiginerusinnaavat.

KØBENHAVNIMI:

Kalaallit Illuutaat Løvstrædemiittoq inuiattut ullorsiornerup nallittorsiutiginissaanut nal. 13-imit qaaqqusivoq.

Pingaarnertut oqalugiartussaq tassaavoq Kalaallit Illuutaata ningiua, Leise Johnsen, aamma nipilersornikkut aliikkusersuisoqassaaq, qilaatersortoqarluni, erinarsoqatigiillu SUKI aamma MIK erinarsussapput.

Nal. 16 Københavnip aqquserngisigut Gammel Torvimut ingerlaaqatigiittoqassaaq.

Kingusinnerusukkullu - nal. 17 - F.C. Nanup unnummut pilersaarutit aallartissavai, ilaatigullu kikkulluunniit akeqanngitsumik nerisassaqartinneqassapput.

Københavnimi aaqqissuussineq uani paasisaqarfiginerusinnaavat.