Ikkap kangerlua aatsitassaqassangatinneqarpoq

Uumassusilinnik tappiorannartunut biologinik, nunap sananeqaatai pillugit ilisimatuunik, aqqartartunillu, Ivittuut massakkorpiaq ulikkaarpoq, Ivittuut kujataatungaani kangerluup Ikkap naqqanik taakku misissuipput.

Ivittuuniit nalunaaquttap akunnerata ataatsip missaani umiatsiaraanni kangerluk Ikka tikittariaavoq, Ikkallu imartaata naqqa napasuliaasanik tusindtit sinneqartunik aatsitassanillu akulinnik ulikkaarpoq. Napasuliaasat, ujaqqamik aatsitassamik Ikait-simik sananeqaateqartut, imermik nungulertortitsisartumik, bakterianillu siornagut siumorneqarsimanngitsunik, aniatitaqartuusut paasineqarsimavoq.

Napasuliaasanik ukiut sisamat matuma siornagut misissuinermi, napasuliat bakterianik aniatitaqartut paasineqarpoq, massakkullu misissuinermi bakteriat taakku siornagut ilisimaneqarsimanngitsut enzyminik, tassa nakorsaasiornermut, imaluunniit inuussutissalerinermut, atorneqarsinnaasunik akoqarnersut paasiniarneqassaaq.

Misissuinermi aamma paasiniarneqassaaq silaannaap allanngoriartornera napasulianut sunniuteqarnersoq. Siornagut misissuinerit paasinarsisippaat, Ikait arfinillit angullugit kiattumiilluni aserujasartoq, taamaattumillu Ikkami imaq kiannerulissappat, napasuliaasat aserorsinnaanerat misissorneqassaaq.

Misissuinermut ilaapput, issittoq pillugu ilisimatusarnersuarmi Galathea 3-mi ilaanissamut unammisitsinermi ajugaasut, GU-mi ilinniartut marluk, nunatsinneersoq danskerlu. Ilinniartut, tappiorannartulerituut peqatigalugit, misissugassanik katerseqataassapput misissueqataallutillu.