Kræftimik eqqugaaneq Ikiuukkumatuut katersinerisigut najorsinnaalersut
Belinda Voigt Lange arnaavoq inuusuttoq 27-inik ukiulik, inuunermik nuannarisaqartoq. Belinda aappanilu, Kuutak Ostermann Egede, ilinniartuupput timersornermillu aallussisuullutik.
Belinda isikkammik assammillu arsarnermik nukkassarnermillu nuannarisaqartuusoq, nappaassuarmit kræftimik eqqugaasimalluni novemberip 16-anni paasitinneqarpoq maannakkullu Danmarkimi katsorsarneqaleruttorpoq.
Belindap nappaateqarnini paaseqqaarpaa tallimariarluni ataannavissumik noqaqattaarnermi kingorna, paasiniaagamilu nakorsanit misissorneqareernermi kingorna qaratsamini tinunermik nassaarfigineqarpoq.
Belindap nappaataanut ersiutit takkuttartut assigiinngitsuusimapput, ilaatigut timersortilluni napaniarnera erloqinartarsimavoq ulluinnarnilu isumai allanngorartarsimallutik.
Nammineerlunili qujamasuutigeqaa nappaat suli siaruaatinngitsoq tinunermik nassaarfigineqarami.
Tusagaq eqqumiitsoq
Qaratsamini tinuneqalersimanerminik ilisimatinneqareerluni Belinda aappani peqatigalugu oktoberimi Danmarkiliarpoq, tinuneq taanna peeriarlugu Nuummut uteqqissasoq nakorsanit nassuiaanneqarpoq.
Suliaritereernerata kingorna Kuutak Nuummut utereersimalersoq Belinda paasitinneqarpoq qarasaaniittoq tinuneq kræftiusoq.
- Tusagaqarnissannut ajortumut ajunngitsumullu piareersarluarnikooriarama, anaanagalu najortigalugu kræfteqalersimanera eqqumiikkaluaqisoq eqqissisimasumik tiguara.
- Eqqarsaatigisarsimasakka inissittutut ipput qasoqqasaramami piffissallu ilaanni isumaga eqqoruminaattarsinnaalluni, Belinda KNR-imut oqarpoq.
Kuutak pingaaruteqarnerpaasoq
Kuutaap asasani ukiuni tallimani najorsimasani kræfteqalersimasoq paasigamiuk orninnissaa nalornissutiginngilaa. Angalanerli Danmarkimilu inuuniarneq akisupput.
Taammaammat Belinda Kuutallu najorsinnaaniassammata Belindap assammik arsartartoqataata aningaasanik katersuiniarnissaq isumassarsiarisimavaa. Nittartakkakkullu katersuiniarneq aallartissimallgu.
- Qularinngilarput Belindap angutaatini najoruniuk nukkassaatigerujussuaannassagaa, katersuiniartut oqaasertaliipput.
Qanoq pinngitsoq aningaasat anguniarneqartut 40.000 koruuniusut katersorneqarput.
Kuutaap ilinniakkani najukkanilu nangaarianngivilluni qimappai decembarillu aallartilaarnerani Belinda ornillugu aallarpoq.
- Kuutaap najortiginissaa uannut pingaaruteqarnerpaavoq, Belinda asannippalulluni oqarpoq.
- Katsorsarnerani nalornissuteqarnanga najorusuppara. Belinda nukittoqaaq, nukittunaaqaara, taamatulli asannippalutsigaluni Kuutak oqarpoq.
Tupinnannartumik nukissaqartoq
Belindap qinnguartartilluni katsorsarneqarnera decemberip tallimaani aallartippoq, iisartakkanillu sakkortuunik timimut qasunarsinnaasunik nakorsaatitulerluni.
Taamaakkaluartoq Belinda nukittuvoq allaallu timersortaleqqissimalluni. Kuutak, ilaquttani katsorsaqatinilu ilaqutartaamisut taasani nukittorsaatigai.
- Suna tamaat nukittorsaatigaara tupinnaannartumik nukissaqarpunga, Belinda amigaateqannginnerarluni oqaluttuarpoq.
Belindap katsorsarneqarnera aatsaat aallartilaarpoq, katillugit 30-riarluni qinnguartarneqartussaavoq maannalu sisamariarluni qinnguartartereerluni.
Ilulissani inuuttaasut nappaassuarmik kræftimik nunaqqatitik eqqugaasimasut pingasut katersuiniuullugit arfininngornermi decemberip qulingani tusarnaartitsissapput, taakkununngalu katersuiniuunneqartussanut Belinda ilaavoq.
