Ikiuiniat Israelimi sakkutuut saassuppaat
Inuit ikinnerpaamik 19-t toqutaapput Israelimiut sakkutuuisa umiarsuit ikiuiartortut annerpaat ullaaq ikkivigimmatigik.
Umiarsuarmi ikiuiartortut amerlaqisut ajunaartullu amerlaqisut Tyrkiamiuupput, Tyrkiallu ministeriunera Erdogan ima ilungersortigaaq Israelimiut saassussinerat "naalagaaffittut peqqarniisaarniarnertut" taallugu.
Saassussineq pillugu Naalagaaffiit Peqatigiit isumannaallisaanermut ataatsimiititaliaat unnugu pinasuartumik ataatsimiissaaq Israelillu ministeriunera Netenyaho maannakkut USA-miittoq præsident Obamamik aqagu ataatsimeeqateqarnissamisut pilersaarunni taamaatillugu tuaviinnaq Israelimut angerlarluni.
Kristeligt Dagbladip Israelimi tusagassiortuata Allan Sørensenip Netanyaho-p angerlarnera ima nassuiarpaa:
- Soorunami Israelip pingaartumillu Netenyaho-p pisoq imaannaanngitsorujussuartut isigaat, Netenyaho-lu angerlarpoq naalagaaffiup akisussaaqataanera takutinniarlugu Israelillu avataanit isigineqarnera paasisitsiniutigineqartoq tapersersorniarlugu soorunalimi aamma pisumi matumani Israelimiut isumaat nassuiarniarlugit, Allan Sørensen oqarpoq.
Umiarsuarni Israelimiut sakkutuuinit ullaaq ikkivigineqartuni ilaasut qallunaanik ilaqanngillat, svenskerli pinerluttulerinermut tunngasunik atuakkiortoq nunarsuarmi tusaamasaq Henning Mankell, ilaatigut pinerluttorsiortoq Wallander pillugu atuakkiortoq, ilaalluni.
Tusarfiit arlallit naapertorlugit taanna Israelimiut ullaaq eqqaassineranni eqqorneqarpoq. Svenskilli nunanut allanut ministereqarfiata nalunaarutaa naapertorlugu imatorsuaq ajoqusersimanani maannalu ikiuiartortut 100-llit arlallit peqatigalugit umiarsuarni ingerlaaqatigiinni arfineq-marluusuni Gazamut ikiuutissanik pajuttuni ilaasoq Israelimi oqartussaasunit tigummigallarneqarluni.
