Ikiuiniarnerup ajutoorluinnarnisaa ernummatigaa
Naalagaaffiit Peqatigiit inunnik ikiuiniarnermut pisortaata, John Holmes-ip, Sudanimi nunap immikkoortuani Darfur-imi ikiuiniartunut ataasiarluniluunniit saassusseqqittoqassagaluarpat ikiuiniarnerup ajutoorluinnarnissaa ernummatigaa.
Naalagaaffiit Peqatigiinnit oqaatigineqarpoq, pissutsit ajorluinnartut, ikiuiniartullu tatisimaneqaqalutik ikiuiniarsarisut:
Naalagaaffiit Peqatigiit inunnik ikiuiniarnermut pisortaa Sudanimi maanna angalavoq, naalakkersuisullu Khartoun-imi ullumikkut ataatsimeeqatigissallugit. Tamatumani isumannaallisaanermut tunngasunik isumaqatigiissuteqarnissaq siunertarineqarpoq. Darfurimi ikiuiniartut taamaalillutik qimaasorpassuarnut nerisassanik, imermik, nakorsaatinillu apuussisinnaaniassammata. Tamannami ajornakusoortinneqaqaaq, Sudanimi naalakkersuisut nunakkut angallassinissaq ilaatigut akueriumanngimmassuk, ikiuiniartullu lastbilit angallatigisaat sakkuaattartunit naalakkersuisunit tapersersorneqartunit aamma pikitsitsinianit ilaatigut saassunneqartuartarmata.
Aamma pikitsitsiniani S.L.A.-mi siuttut ilaat ernummateqarpoq:
- Nunarsuarmiut qinnuigaakka periarfissat tamaasa atorlugit iliuuseqaqqullugit. Inuit Darfurimi naalliuutaat minnerulersinnaaqqullugit, oqarpoq.
Tassa Khartoun-imi naalakkersuisut kimigiiserfiginerisigut, aamma naalagaaffimmut pillaatitut iliuutsit sakkortusinerisigut. Tamannali Naalagaaffiit Peqatigiit ikiuiniarnermut pisortaata qunusaarutiginianngilaa. Kisianni naalagaaffimmut pillaatitut iliuutsit inuinnarnut eqquisariaqanngitsut oqaatigaa. Kisianni Naalagaaffiit Peqatigiinni pisortap Sudan-imi naalakkersuisunit tikilluaqquneqarnissani naatsorsuutigisinnaassanngilaa, tassa Darfurimi isumannaatsuunissaq pineqarpat. Ingammik naalagaaffiit angisuut pillaatitut iliuuseqarniarlutik qunusaarinerisa nalaani.
Tuluit ministeriunerata Tony Blair-ip Darfurimut timmisartuussisarneq unitsikkusuppaa, Tyskit kansleriata Angela Merkelip Darfurimi pissutsit akuerineqarsinnaannginnerarpai. Aamma USA pillaatitut iliuusissanik sakkortuunik qunusaaruteqarpoq. Tamakkuli iliuuseqarfigineqarsinnaagunanngillat Naalagaaffiit Peqatigiinni isumannaallisaaneq pillugu siunnersuisoqatigiinni Sudanip pingaarnertut illersuisuata Kina-p pillaatitut iliuuseriniakkat pinngitsoortittarmagit, Darfurimi uuliasiornermik soqutigisaqarnerujussuani patsisigalugit.
