Ikiuiniaqatigiiffiit Burmami angummassinnaanngillat

Myanmarimi siorna anorersuarujussuarnerani Pai Ei-p pigisatuannguani tamaasa kuussuup Rivardip akuani, tamaasa annaavai.

Illuikkiamini ulissuarmik asiulersumik qalilimmi 10 m2 -isut angitigisumi ernini marluk peqatigalugit ullumikkut najugaqarpoq. Kiaqaaq, sialummullu illersuutaaniaraluaq putoqangaarmat masammut iluaqutaavallaarani.

Kiattulli anorersuata Narkisip siorna pitoraannerata kingorna nunaqqatini peqatigalugit atugarliortitaalerpoq.

Taamani innuttaasut 140.000-t ajunaarput. Annattutuallu suli ullumimut ullormiit ullormut annanniartuarsinnarput.

Najugaat ulissuaqaraluartoq, pinngortitap nukiinut akiuussinnaanngilaq.

Ilalerlugu imeq amigaataavoq.

Ikiuiniaqatigiit nalilerpaat innuttaasut 240.000-t imermik eqqiluitsumik maannakkorpiaq pisariaqartitsisut.

Narsaatit qaqorteqqasunik naatitsiviit anorersuarnerani immap tarajuanik qarsunneqarmata isumalluutaajunnaarsimapput; anorersuarujussuareerneratalu kingorna naatitat pingajorarterutaannaat iluatsittumik naatinneqarsimapput.

Kuup akuani najugallit avataanit ikiorneqarnissaminnik utaqqiinnarrapput. Sulili ernumanerusumi pisoqaleraluttuarpoq - tassalu kiattup sialussua Monsun nalliukkaluttualermat.

Pisarneq malillugu sapaatip akunneri marlussuit qaangiuppata sialussualissaaq , oqqissimanngitsullu atugarliortinneqassaqisut, ikiuiniaqatiigiiffiit mianersoqqussitigaat.