Ikiuigasuartussanik piareersimasuutitaqanngilagut
Umiarsuapiluunersuaq takornariartaat - Grand Princess - aasaq Kalaallit Nunaata imartaani 3.600-nik ilaasoqarluni angalaartoq taassuma innersuussutigaa.
- Umiarsuarsuaq ikkarlissimagaluarpat imaluunniit Titanic-itut ilulissamut aporsimagaluarpat, Grand Princess-imiittut tamakkerlugit annaanniarsinnaanissaannut naammattumik angissusilimmik umiarsuaateqanngilagut. Aamma umiarsuaq taama angitigisoq avataaniitilluni ajornartorsiulissagaluarpat qallunaat alapernaarsuutaannik umiarsuarsuup ilaasuinik taama amerlatigisunik annaassiniarsinnaasunik peqanngilaq, tassami qulimiguullit pigineqartut Lynx-it tallimanik arfinilinnilluunniit taamaallaat ilaasoqarsinnaasut pigineqarput kiisalu sakkutuut alapernaarsuutaat Vædderen amerlanerpaamik 200-nik imaluunniit 300-nik ilaasoqarsinnaavoq, apeqquteqaammi taama tunngavilersuisoqarpoq.
Ilaasut nunamukaassorneqassappata, taava napparsimmaviit piareersimappat? Marie Fleischer ilaatigut aperivoq. Taamatut pisoqaratarsinnaanera apeqqutaannginnerarpaa, kisianni taamatut ajutoortoqarpat iliuusissat pineqarput, tassami sakkutuut imarsiortut nakkutilliisuisa ataasiaratik naammattoortarpaat umiarsuarsuit takornariartaatit immap assingisigut nalunaarsugaanngitsutigut ingerlaartut.
- Naammanngilaq nunarput umiarsuapiluunersuarnik takornariartaatinik orninneqartartutut taaguinnassallugu, taamatummi inissinnitsinni akisussaaffeqarnerput malinnaatittariaqarparput, Marie Fleischer ilaatigut allappoq.
