Ikiueqqaarnermik pikkorissartut 24-t allagartartaarput
TIMI ASIMI-mi, inuusuttunik piginnaanngorsaanermik suliaqarfiusumi, peqataasut tamarmik ikiueqqaarnermik pikkorissarnermut nalunaaquttap akunnerinik 24-nik sivisussusilimmut peqataaqqammerput. Inuusuttut taamaasillutik siunissami inuunermik annaassiniarnissaminnut sakkussaqalerput.
Allattoq Peter Troelsen, Simon Uldum
novembarip 14-at 2013 07:43
Ikiueqqaarnermik pikkorissaaneq Kalaallit Røde Korsiat suleqatigalugu ingerlanneqartoq, inuusuttut peqataasut piginnaanngorsarneqarnerisa ilinniakkamillu aallartitsinissaannut kajumilersitsiniarluni suliniuteqarnerup ilagaa.
Ukiuni kingulleni marlunni arfinileriarlugu ingerlanneqarsimavoq, inuusuttut Nuummeersut Tasiilameersullu 73-it ilinnialernissaminnut periarfissatik tassuuna annertusarsimavaat.
Suliniut maannakkorpiaq Nuummi ingerlanneqartoq aningaasassaaleqineq pissutigalugu kingusinaartumik aallartinneqarpoq, aningaasaliissutaasulli minnerpaaffimmiitillugit TIMI ASIMI ingerlanneqarsimasoq, suliniutinik ingerlatsisoq Kim Godtfredsen oqaluttuarpoq.
