Ikiueqqaarnermik iliniagallit nutaat piareerput
Kalaallit Røde Korsiat ikiueqqaarnermut ilitsersuisussanik qulingiluanik ilinniartitseqqammerpoq. Ilinniarneq taanna nutaaq Røde Kors Danmark suleqatigalugu piareersarneqarsimavoq.
Allattoq Carla Davidsen
aggustip 20-at 2011 11:35
Siornatigut pikkorissartarnernut naleqqiullugu pikkorissarnermut ilaasunut atorluaasinnaanermut atuakkersornermullu piumasaatit annertungaatsiartumik qaffasinnerupput, taamatullu avataaniit censorilerluni misilitsinnermik naggaserneqarluni.
Ilinniarneq Nuummi sapaatip-akunnerini marlunni pivoq, ikiueqqaarnerlu inuunermik annaassiniarnerummat, ilitsersuisutullu Danmarkimi Europamilu ikiueqqaarnerup ineriartorneranut malinnaajuarnissaq pingaaruteqarluni, Kalaallit Nunaanni ikiueqqaarnerup ajunnginnerpaamik atorsinnaanissaa anguniarneqarsimavoq. Kalaallit Røde Korsiannit tusagassiuutinut taama allapput.
Pikkorissarsimasut qulingiluat Qasiannguaniit, Kangerlussuarmiit, Qaqortuniit Nuumminngaanniillu aggersuupput.
